देवसेनाने केली चाळीशी पार….

दक्षिण भारतीय चित्रपटसृष्टीतील लेडी सुपरस्टार म्हणून ओळखली जाणारी अभिनेत्री अनुष्का शेट्टी(Anushka Shetty) 41 वर्षाची झाली आहे.  तमिळ चित्रपटापासून अभिनय क्षेत्रात प्रवेश केलेल्या अनुष्काचे मुळ नाव स्विटी आहे.  ही स्विटी उच्चविद्याविभुषीत असून चित्रपटात येण्यासाठी अनुष्का कधीही फारशी उत्सुक नव्हती.  मात्र आता तमिळ आणि तेलगु चित्रपटसृष्टीमध्ये अनुष्का शेट्टी (Anushka Shetty)पहिल्या स्थानावर विराजमान असून सर्वाधिक मानधन घेणारी अभिनेत्री म्हणून तिला ओळखले जाते.  याशिवाय अनुष्का अन्य कारणांनीही ओळखली जाते.  त्यामध्ये  तिचे प्रभासबरोबरचे प्रेम प्रकरण आणि महागड्या गाड्यांचा शौक यांचीही चर्चा अधिक असते.  

दक्षिण चित्रपटसृष्टीतील लोकप्रिय अभिनेत्री अनुष्का शेट्टी (Anushka Shetty)41 वा वाढदिवस साजरा करत आहे. तेलगू आणि तमिळ चित्रपटसृष्टीत अनुष्काला लेडी सुपरस्टार म्हटले जाते.  अनुष्काने आतापर्यंत 50 हून अधिक चित्रपटात काम केले असून तिच्या बाहुबलीतील भूमिकेमुळे अनुष्काची ओळख सातासमुद्रापारही झाली आहे. अनुष्काचे खरे नाव स्वीटी शेट्टी आहे.   अनुष्काचे शिक्षण बंगळुरूच्या प्रसिद्ध गर्ल्स कॉलेज ,माउंट कार्मेल मध्ये झाले आहे.  याच  कॉलेजमध्ये दीपिका पदुकोण आणि अनुष्का शर्मा यांचेही शिक्षण झाले आहे.  अनुष्काच्या कुटुंबात सर्व डॉक्टर किंव इंजिनिअर आहेत.  मात्र बॅचलर ऑफ कॉम्प्युटर ऍप्लिकेशनची पदवी घेतलेल्या अनुष्कानं अभिनय क्षेत्रात आपला दबदबा निर्माण केला. कारकिर्दीच्या शिखरावर असताना अनुष्काचे 5 वर्षात 23 चित्रपट प्रदर्शित झाले. 5 फूट 9 इंच असलेली अनुष्का शेट्टी(Anushka Shetty) टॉलिवूडमध्ये सर्वात उंच असलेली अभिनेत्री आहे.  त्यामुळे तिला मिळणा-या भूमिकाही दमदार राहिल्या आहेत.  आपल्या चित्रपटासाठी अनुष्का प्रचंड मेहनत घेते.  बाहुबलीसाठी तिनं शस्त्रास्त्र चालवण्याचे प्रशिक्षण घेतले.  तर साइज झिरो या चित्रपटासाठी अनुष्काने लठ्ठ महिलेच्या भूमिकेसाठी सुमारे 20 किलो वजन वाढवले.  अनुष्का शेट्टीचा 2018 चा भागमथी  हा पहिला महिला-आधारित दक्षिण भारतीय चित्रपट ब्लॉकबास्टर ठरला होता.  

या यशात अनुष्का आपल्या योगसाधनेला श्रेय देते.  भरत ठाकूर यांच्याकडून तिने योगाचे धडे घेतले असून ती उत्तम योगशिक्षिका ही आहे.  बाहुबली चित्रपटापासून अनुष्काची ओळख देवसेना अशीच झाली. त्यासोबत तिच्या नावाबरोबर अभिनेता प्रभासचे नाव जोडले गेले. प्रभास आणि अनुष्का यांचे प्रेमप्रकरण खूप गाजले.अगदी दोघंही लग्न करणार इथपर्यंत बातम्या आल्या.  मात्र त्यानंतर अनुष्काचे एका घटस्फोटीत अभिनेत्याबरोबर प्रेमप्रकरण चालू असल्याची बातमी आली.  त्यासोबत दुबईस्थित व्यापा-याबरोबरही अनुष्काचे नाव जोडले गेले.  त्यांच्याही लग्नाच्या बातम्या आल्या.  अनुष्का आता या बड्या व्यापा-याबरोबर लग्न करुन दुबईला स्थिरावणार अशा बातम्या आल्या.  यासोबत तिच्या दुबईतील अलिशान घराचे फोटोही सोशल मिडीयावर आले.   पण या अभिनेत्रीनं या सर्व बातम्यांना दूर सारत आपल्या करिअर आणि अभिनयावर लक्ष केंद्रीत केले.  याचाच परिणाम म्हणजे टॉलिवूडमध्ये अनुष्का (Anushka Shetty) सर्वाधिक मानधन घेणारी अभिनेत्री ठरली आहे.  एकूण अनुष्काचे प्रेम प्रकरण आणि तिच्या लग्नाची बातमी अपूर्णच राहीली. 

=====

हे देखील वाचा : इगो प्रॉब्लेममुळे ‘या’ सिनेमाच्या टायटल्स मधून कलावंताची नावेच काढून टाकली!

=====

अनुष्कानं लक्ष्यम, शौर्यम, अरुंधती, सिंघम, वनम, रुद्रमादेवी सारख्या चित्रपटांमधून आपला ठसा उमटवला आहे.  बाहुबलीच्या यशानंतर तर अनुष्कानं 4 ते 5 कोटी रुपयांपर्यंत आपले मानधन वाढवले आहे.  अनुष्का शेट्टीची एकूण संपत्ती 140 कोटी रुपये आहे.  हैदराबादच्या ज्युबली हिल्समध्ये तिचे आलिशान घर आहे. अनुष्काला अलिशान गाड्यांचीही आवड आहे.  टोयोटा कोरोला,  बीएमडब्ल्यू 6,  ऑडी क्यू 5 आणि ऑडी क्यू 6 सारख्या अनेक लक्झरी कार आहेत.  या सर्व गाड्या करोडो रुपये किंमतीच्या आहेत.  एवढंच नाही तर अनुष्कानं आपल्या ड्रायव्हरलाही 12 लाखाची गाडी भेट म्हणून दिली आहे.   

बाहुबलीमध्ये देवसेना बनून आलेली अनुष्का शेट्टी प्रत्यक्षातही एखाद्या राजकन्येसारखं आयुष्य जगत आहे.  वयाची चाळीशी ओलांडलेली ही राजकन्या आता कुठल्या राजकुमाराबरोबर लग्न करतेय याचीच उत्सुकता तिच्या चाहत्यांना आहे.  

सई बने