अभिनयासाठी अपूर्वाने सोडली बँकेतली नोकरी

गावातील बडं प्रस्थ असलेल्या आणि बाईलवेड्या अण्णा नाईक यांच्या प्रेयसीच्या शेवंताच्या भूमिकेला अपूर्वा अपूर्वा नेमळेकर ने इतके लोकप्रिय केले की अण्णा आणि शेवंता यांच्यावर सोशल मीडियामध्ये असंख्य मीम्स तयार झाले. खरंतर शेवंताची भूमिका ही नाईकांचे घर उध्वस्त करणारी. त्यामुळे माई नाईक या अण्णांच्या बायकोवर प्रेम करणाऱ्या चाहत्यांसाठी शेवंता म्हणजे पक्की खलनायिका. तरीही शेवंताचा फॅनक्लब वाढवण्यासाठी अपूर्वाच्या अदाकारी अभिनयाने कमाल केली.

कलाक्षेत्रात येण्यापूर्वी अपूर्वा बँकेत नोकरी करायची. खरं तर अनेक कलाकारांच्या बाबतीत असं होत असतं की अचानक एखाद्या मालिकेत किंवा सिनेमात काम करण्याची संधी त्यांना मिळते आणि या क्षेत्रात यायचं नसताना हे क्षेत्र म्हणजेच त्यांच्या करिअर बनते. अपूर्वा बाबतीतही अगदी असंच झालं. बँकेतली नोकरी आणि ज्वेलरी डिझाईनची आवड या गोष्टींमध्ये ती रमलेली होती.

हे देखील वाचा: सुकन्या कुलकर्णी मोने यांचा जीवनपट हा एक प्रेरणास्रोत आहे.

एकदा एका मालिकेच्या मुख्य भूमिकेसाठी तिला विचारणा झाली मात्र तिला अभिनयाकडे वळायचंच नव्हतं. अर्थात ही गोष्ट तिने  तिच्या बाबांना बोलून दाखवली तेव्हा तिचे बाबा तिला म्हणाले, ऑडिशन देऊन बघायला काय हरकत आहे. ऑडिशन दिली म्हणजे तुला काम केलंच पाहिजे असं काही नाही. अपूर्वा तिच्या बाबांचे म्हणणे पटले आणि ती ऑडिशनला गेली. ऑडिशनसाठी तिला दिलेला संवाद तिने असा काही म्हटला की त्या मालिकेसाठी तिची निवड झाल्याचा तिला फोन आला आणि ती मालिका होती आभास हा.

याच मालिकेत मुख्य नायिका म्हणून अपूर्वाचा कॅमेरासमोरचा प्रवास सुरू झाला. त्यानंतर आराधना या मालिकेतही अपूर्वाची वर्णी लागली. मात्र घराघरात पोहोचली ती शेवंता याच भूमिकेने. रात्रीस खेळ चाले या मालिकेच्या पहिल्या सिक्वेलमध्ये शेवंताचा कुठेच चेहरा नव्हता. मात्र तिचा उल्लेख या मालिकेत होता. त्यामुळे साहजिकच या मालिकेचा दुसरा सिक्वेल आला तेव्हा शेवंताची भूमिका कोण करणार याबाबत कमालीची उत्सुकता होती, आणि ही संधी चालून आली अपूर्वाकडे. त्या संधीचं सोनं करत अपूर्वाने शेवंता या एका पात्रावर या मालिकेला प्रचंड लोकप्रियता मिळवून दिली. सध्या ती तुमच आमचं जमलं या मालिकेत पम्मी ही भूमिका साकारत आहे. ही भूमिका देखील काहीशी शेवंता याच भूमिकेच्या जवळपास जाणारी एक दिलखेचक  असलेली  अशी आहे. 

हे वाचलंत का: अमृता खानविलकर…. हिंदीचं ग्लॅमर, मराठी ठसका

अपूर्व आणि आत्तापर्यंत आभास हा आराधना ही मालिका, एका पेक्षा एक डान्स शो, भाकरखाडी, इश्कवाला लव्ह हे सिनेमेही केले. पण रात्रीस खेळ चाले या मालिकेतील वयापेक्षा मोठ्या असलेल्या अण्णांवर फिदा झालेल्या शेवंता या भूमिकेने अपूर्वाला कायमची ओळख दिली. ही भूमिका स्वीकारणं हे तिच्यासाठी आव्हानच होतं.

नायिका म्हणून मालिकेत मिळालेल्या ब्रेकनंतर थेट चार मुलांच्या वयस्कर  अण्णा नाईकांच्या प्रेमात वेडी झालेली बाई ही ऑफर स्वीकारणं आणि लोकप्रिय करणं हा अपूर्वासाठी टास्कच होता आणि आता मालिका पडद्याआड जाताना शेवंताला मिस करणार ही प्रेक्षकांची प्रतिक्रियाच खूप मोठी आहे असं तिला वाटतंय. मालिकेत अण्णांवर फिदा झालेल्या शेवंताच्या रूपातील अपूर्वावर तिचे चाहते  खूप फिदा आहेत.

-अनुराधा कदम