Bigg Boss Marathi 6 शी अंकिता वालावलकरचं आहे खास कनेक्शन; व्हिडिओ शेअर स्वतः करत दिली माहिती
टीव्हीवरील सर्वात चर्चित रिअॅलिटी शो पैकी एक असलेला ‘Bigg Boss Marathi ’ पुन्हा एकदा प्रेक्षकांच्या भेटीला येण्यासाठी सज्ज झाला आहे. हिंदी बिग बॉसचा 19 वा सीझन नुकताच संपला असून, त्यानंतर लगेचच मराठी बिग बॉसच्या नव्या पर्वाची चाहूल लागली. यावेळीही प्रेक्षकांच्या लाडक्या अभिनेता रितेश देशमुखकडेच सूत्रसंचालनाची धुरा असणार आहे. कलर्स मराठी वाहिनीने नुकताच ‘बिग बॉस मराठी 6’ चा पहिला प्रोमो प्रदर्शित केला आणि सोशल मीडियावर चर्चेला उधाण आलं. या प्रोमोमधून शो अधिक रंगतदार आणि वेगळ्या अंदाजात सादर होणार असल्याचे संकेत मिळत आहेत. विशेष म्हणजे, हा बहुचर्चित सीझन 11 जानेवारीपासून प्रेक्षकांच्या भेटीला येणार आहे.(Bigg Boss Marathi 6)
दरम्यान, प्रोमो समोर आल्यानंतर एका जुन्या स्पर्धकाच्या पोस्टने सर्वांचं लक्ष वेधून घेतलं. ‘कोकण हार्टेड गर्ल’ म्हणून ओळख मिळवलेल्या अंकिता प्रभू वालावलकर हिने सोशल मीडियावर केलेल्या पोस्टमुळे चर्चेला नवा विषय मिळाला आहे. अंकिताने तिचा पती कुणाल भगत आणि बिग बॉस मराठीच्या सहाव्या पर्वाचा काहीतरी खास संबंध असल्याचं सूचक विधान केलं. यामुळे चाहत्यांमध्ये “कुणाल भगत बिग बॉसच्या घरात जाणार का?” अशी जोरदार चर्चा सुरू झाली आहे.
‘बिग बॉस मराठी 6’ च्या प्रोमोशी अंकिता प्रभू वालावलकरच्या नवऱ्याचा खास संबंध असल्याची माहिती समोर आली आहे. याबाबत अंकितानं स्वतः सोशल मीडियावर पोस्ट शेअर करत खुलासा केला आहे. अंकितानं सांगितलं की, तिचा नवरा कुणाल भगत यानं ‘बिग बॉस मराठी 6’ च्या प्रोमोचं संगीत तयार केलं आहे. इतकंच नाही तर हा प्रोमो कुणालच्या मड आय स्टुडिओमध्येच एडिट करण्यात आला आहे. शेअर केलेल्या व्हिडीओमध्ये प्रोमो एडिटिंगदरम्यानचे क्षणही पाहायला मिळतात. याआधी ‘बिग बॉस मराठी 5’ च्या प्रोमोचं म्युझिकसुद्धा कुणालनंच केलं होतं, अशी माहिती अंकितानं दिली.“हे काम पाहताना आमचा सीझन आठवला,” असं ही ती म्हणाली. (Bigg Boss Marathi 6)
================================
================================
याआधीचा म्हणजेच पाचवा सीझन प्रेक्षकांच्या विशेष पसंतीस उतरला होता. विजेता सूरज चव्हाणसह इतर अनेक स्पर्धकांनीही आपली वेगळी छाप पाडली होती. त्यामुळे सहाव्या पर्वाकडून प्रेक्षकांच्या अपेक्षा अधिकच वाढल्या आहेत.हिंदी बिग बॉसच्या मंचावर स्वतः रितेश देशमुखने जाऊन मराठी बिग बॉसची घोषणा केल्यानंतर या शोविषयीची उत्सुकता शिगेला पोहोचली आहे. आता नव्या स्पर्धकांची यादी, घरातील थीम आणि होणारे ट्विस्ट्स यांची प्रेक्षक आतुरतेने वाट पाहत आहेत.एकंदरीत, ‘बिग बॉस मराठी 6’ हा सीझन मनोरंजन, ड्रामा आणि अनपेक्षित घडामोडींनी भरलेला असणार, यात शंका नाही.