Dhurandhar चित्रपटाचा धमाका; रेकॉर्ड्स बघून हैराणच व्हाल!
‘याखी दुस दुस एंदी ख्वश फस्लन, याखी त्फुज फुज वल्ला खुश रक्सा…’; आदित्य धर दिग्दर्शित ‘धुरंधर’ या चित्रपटातील या गाण्याने सोशल मिडियावर धुमाकूळ घातला आहे… इतकंच नाही २०२५ या वर्षातील रणवीर सिंगच्या (Ranveer Singh) या चित्रपटाने ‘पुष्पा २’ पासून ते अगदी छावा पर्यंतच्या बऱ्याच चित्रपटांचे बॉक्स ऑफिसचे रेकॉर्ड मोडले आहेत… धुरंधरच्या कमाईमुळे बॉक्स ऑफिस हादरलं आहे… खरं तर, सुरुवातीला कुणालाच वाटलं नव्हतं, की धुरंधर इतकी कमाई करेल, पण एकीकडे माउथ पब्लिसिटी आणि दुसरीकडे लॉर्ड अक्षय खन्ना यांनी मार्केट खाऊन टाकलं. बरं इतकं की, अक्षय खन्ना इतका लाईम लाईटमध्ये आला की रणवीर सिंग हिरो अशूनही तो साईड हिरो वाटू लागला… चला तर जाणून घेऊयात ‘धुरंधर’चे रेकॉर्ड्स…(Dhurandhar movie box office records)
तर, रिलीजच्या ओपनिंग डे ला ‘धुरंधर’ने २८.६० कोटींची कमाई केली होती, दुसऱ्या दिवशी ३३.१० कोटी नंतर तिसऱ्या दिवशी म्हणजे रविवारी केली ४४.८० कोटींची कमाई… आता इतका मोठा सिनेमा आणि सुरुवातीला ही आकडेवारी दमदार नसल्यामुळे काही क्रीटिक्स म्हणत होते की, ‘धुरंधर’ जास्तीत जास्त २५० कोटी कमवेल. त्यात पहिल्या आठवड्यानंतरचा सोमवार फार महत्वाचा असतो, पण धुरंधरने सोमवारी २४.३० कोटी कमावले आणि दुसऱ्या आठवड्याची दमदार सुरुवात केली… शिवाय, ‘धुरंधर’च्या गाण्यांमुळे आणि मुव्ही रिव्ह्यूजमुळे लोकं मोठ्या संख्येने थिएटर्समध्ये वळली. पुढे मंगळवारी २८ कोटी, बुधवारी २९ कोटी, गुरुवारी २९ कोटी आणि शुक्रवारी तर चित्रपटाने पार राडाच केला. शुक्रवारी ‘धुरंधर’ने कमावले तब्बल ३४.७० कोटी रुपये… आजपर्यंत बॉलीवूडच्या इतिहास दुसऱ्या शुक्रवारी इतकी कमाई कुणीच केली नव्हती. आणि याआधी हा रेकॉर्ड २७.५० कोटींसह ‘पुष्पा २’ च्या नावावर होता. (Entertainment news)
================================
हे देखील वाचा : बॉबी देओल ते Akshaye Khanna; बॉलिवूडचे ‘हे’ खलनायक नायकांवर पडले भारी!
================================
‘धुरंधर’ची गाडी इथेच थांबली नाही. पुढे दुसऱ्या शनिवारी तर चित्रपटाने ५३.७० कोटी कमावले आणि दुसऱ्या रविवारी तर कहरच केला आणि ५८.२० कोटींची कमाई केली. सहसा चित्रपट सुरुवातीच्या आठवड्यात बक्कळ कमाई करतात आणि थंड पडतात. पण ‘धुरंधर’ने बॉक्स ऑफिसवर आपली आग कायमच ठेवली. परत पुढचा दिवस नवीन रेकॉर्ड… त्याच्या पुढचा दिवस परत नवीन रेकॉर्ड… म्हणजे दुसरा शुक्रवार, शनिवार, रविवार, सोमवार आणि मंगळवार असे एका दिवसात हायेस्ट कमाई करण्याचे सर्व रेकॉर्ड ‘धुरंधर’ने आपल्या नावावर केले आणि यासोबतच रणवीर सिंगचा सर्वाधिक कमाई करणारा चित्रपट ठरला. (Blockbuster bollywood movie of 2025)
याआधी रणवीरच्या ‘पद्मावत’ने (Padmaavaat) ३०२ कोटी रुपये छापले होते. दिवसा कमाईच्या रेकॉर्डसोबत ‘धुरंधर’ दुसऱ्या आठवड्यात सर्वात जास्त पैसे कमावणारा सिनेमासुद्धा ठरला. दुसऱ्या विकेंडमध्ये ‘धुरंधर’ने तब्बल २६१ कोटी रुपये कमावले. सिंगल डे पासून ते विकेंडच्या हायेस्ट कलेक्शनपर्यंत सगळेच रेकॉर्ड्स इथे ‘धुरंधर’ने मोडलेले आहेत. आतापर्यंत या चित्रपटाने वर्ल्ड वाईड बॉक्स-ऑफिसवर ९०० कोटी रुपये कमावले आहे. त्यामुळे १००० कोटींचा टप्पा तो गाठूच शकतो. पण सोबत दोन रेकॉर्ड्सवर त्याचा डोळा आहे, तो म्हणजे सर्वाधिक कमाई करणारा बॉलीवूड चित्रपट आणि सर्वाधिक कमाई करणारा हिंदी चित्रपट… कन्फ्युज होऊ नका… मलाही माहितीये की बॉलीवूडवाले हिंदीच आहेत. पण ‘पुष्पा-२’ (Pushpa 2) ने डब करून हिंदीमध्ये सर्वाधिक कमाईचा आकडा गाठला होता. ‘पुष्पा’ने फक्त हिंदीमध्येच तब्बल ८३० कोटी रुपये कमावले होते. हिंदीत ७०० आणि ८०० कोटी क्लब ‘पुष्पा’नेच चालू केले आहेत. पण आजपर्यंत एखादा बॉलीवूडचा चित्रपट हिंदीत हा माईलस्टोन गाठू शकलेला नाही. (Ranveer singh movie box office collection)
================================
================================
आतापर्यंत ‘जवान’, ‘स्त्री’ आणि ‘छावा’ (Chhaava) हे तीन चित्रपट ६०० कोटींच्या पार गेले आहेत. त्यामुळे ‘धुरंधर’ हा बॉलीवूडचा हायेस्ट ग्रॉसर तर होईलच पण सोबतच हिंदीत सर्वात जास्त पैसे कमावणारा चित्रपटसुद्धा लवकरच ठरू शकतो. आणखी एक रेकॉर्ड ‘धुरंधर’च्या नावे होणार आहे तो म्हणजे सर्वाधिक दिवस डबल डीजीट आकडा गाठणं… म्हणजे आतापर्यंत ‘धुरंधर’ने दर दिवशी १० कोटींच्या वर पैसे कमावले आहेत. हा रेकॉर्ड ‘पुष्पा २’च्या नावे आहे. ‘पुष्पा’ने २१ दिवसांपर्यंत हा आकडा गाठला होता आणि २२ व्या दिवशी १० कोटींच्या खाली कमाई केली होती. पण ‘धुरंधर’ तब्बल ३० दिवस सलग १० कोटींची कमाई करणार हे आता जवळपास कन्फर्म झालं आहे. त्यामुळे आता आणखी किती रेकॉर्ड्स ‘धुरंधर’ नेस्तनाबूत करतोय, याकडे सर्वांचंच लक्ष्य आहे. (Aaditya Dhar Movies)
Get Latest Marathi Entertainment update | Movies Reviews in Marathi | Celebrities Update in Marathi
-सागर जाधव