Punha Ekda Sade Made Teen Title Song: भावंडांमधली मस्ती आणि निखळ आपुलकी ’पुन्हा एकदा साडे माडे तीन’चं धमाकेदार प्रमोशनल साँग प्रदर्शित!
भावंडांमधली मस्ती, टोमण्यांची फटकेबाजी आणि निखळ आपुलकी यांचा गोड गोंधळ म्हणजेच कुरळे बंधू! हाच खट्याळ, मनमोकळा उत्साह ‘पुन्हा एकदा साडे माडे तीन’ (Punha Ekda Sade Made Teen) या आगामी मराठी चित्रपटाच्या नव्या प्रमोशनल गाण्यातून प्रेक्षकांसमोर आला आहे. आधीच टीझर आणि ट्रेलरने चर्चेचा जोर धरलेला असताना, हे नव्यानं प्रदर्शित झालेलं गाणं सोशल मीडियावर झपाट्याने लोकप्रिय होत आहे. या गाण्याला खास रंग चढवतो तो अवधूत गुप्ते यांचा उत्साही आवाज. त्यांच्या गायनातील सहजता आणि जोश गाण्याला वेगळ्याच उंचीवर नेतो. संगीतकार गौरव चाटी आणि आदित्य बेडेकर यांनी तालबद्ध, मजेशीर संगीत दिलं असून, गीतकार विक्रांत हिरनाईक यांच्या साध्या पण हृदयस्पर्शी शब्दांतून तीन भावांमधील निरागस नातं सुंदरपणे उलगडतं. हे गाणं ऐकताना नकळतच मूड फ्रेश होतो आणि चेहऱ्यावर हसू उमटतं. (Punha Ekda Sade Made Teen Title Song)
विशेष म्हणजे हे गाणं चित्रपटाच्या कथानकाचा भाग नसून खास प्रमोशनसाठी तयार करण्यात आलं आहे. कथेत स्वतंत्र गाण्याची जागा नसल्यामुळे निर्मात्यांनी वेगळ्या पद्धतीनं प्रेक्षकांपर्यंत पोहोचण्याचा निर्णय घेतला. मात्र आधीच अजय–अतुल यांच्या संगीताचं गाणं प्रेक्षकांच्या मनात ठसा उमटवून गेलं असल्याने, त्याच भावनेशी नातं राखत पण पूर्णपणे वेगळ्या चवीचं काहीतरी देण्याचं आव्हान होतं.
या संदर्भात दिग्दर्शक अंकुश चौधरी सांगतात की, चित्रपटासाठी नवं गाणं बसवणं शक्य नसल्यामुळे प्रमोशनल साँगचा पर्याय निवडण्यात आला. अजय–अतुल यांच्याशी चर्चा झाली होती, पण वेळेच्या अडचणीमुळे ते शक्य झालं नाही. त्याचदरम्यान चित्रपटातील एका बॅकग्राऊंड म्युझिकवरून प्रेरणा घेऊन नव्या गाण्याची कल्पना आकाराला आली. यावेळी प्रेमकथांऐवजी तीन भावांच्या नात्यावर लक्ष केंद्रित करत, हलकंफुलकं आणि मनाला भिडणारं गाणं बनवण्यात आलं.आता टीझर, ट्रेलर आणि या प्रमोशनल गाण्यानंतर ‘पुन्हा एकदा साडे माडे तीन’बद्दलची उत्सुकता कमालीची वाढली आहे. मोठ्या पडद्यावर या तीन भावांचा धमाल प्रवास पाहण्यासाठी प्रेक्षक आतुर झाले आहेत. हा चित्रपट ३० जानेवारी रोजी सर्वत्र प्रदर्शित होणार आहे. (Punha Ekda Sade Made Teen Title Song)
===========================
हे देखील वाचा: Jai Jai Swami Samarth मालिकेत निर्णायक वळण; भावनिक अध्यायाची होणार सुरुवात!
===========================
चित्रपटात भरत जाधव, मकरंद अनासपुरे, सिद्धार्थ जाधव आणि रिंकू राजगुरू प्रमुख भूमिकेत दिसणार असून, संजय नार्वेकर पाहुण्या कलाकाराच्या भूमिकेत झळकणार आहेत. सुशीलकुमार अग्रवाल आणि अल्ट्रा मीडिया अँड एंटरटेनमेंट प्रस्तुत, उषा काकडे प्रॉडक्शन्स आणि ईओडी मीडिया यांच्या निर्मितीत तयार झालेल्या या चित्रपटाला अमेय विनोद खोपकर पिक्चर्सची साथ लाभली आहे. उषा काकडे, पुष्कर यावलकर, सुधीर कोलते, स्वाती खोपकर आणि निनाद नंदकुमार बत्तीन हे निर्माते असून, सहनिर्मितीची जबाबदारी मोहसिन खान, यशराज टिळेकर, सौरभ ललवाणी आणि धनविक एंटरटेनमेंट यांनी सांभाळली आहे.