‘All Is Well’ सिनेमात दिसणार धमाल त्रिकुट; अमर, अकबर आणि अँथनीची धमाकेदार गोष्ट येतेय भेटीला!  

All Is Well:  मराठी चित्रपटसृष्टीत हास्य, भावनिक गुंतवणूक आणि नात्यांचे बारकावे यांची मेजवानी अनेकदा पाहायला मिळते. अशाच एका निखळ मनोरंजनाच्या प्रवासासाठी सज्ज झाला आहे आगामी मराठी सिनेमा ‘ऑल इज वेल’. विनोदी वळण असलेला पण मनाला भिडणारा हा सिनेमा २७ जून रोजी प्रेक्षकांच्या भेटीला येत आहे. “तीन तिघाडा काम बिघाडा” ही म्हण आपण अनेकदा ऐकतो, पण यावेळी मात्र ती तीन मित्रांची भन्नाट गोष्ट सांगण्यासाठी नकारार्थी नसून खळखळून हसवणारी ठरणार आहे.आणि या मध्ये  अमर, अकबर आणि अँथनी या तिघांची अफलातून मैत्री आणि त्यांच्या जीवनातील एक अविस्मरणीय प्रवास पहायला मिळणार आहे. (All Is Well Marathi Movie)

प्रियदर्शन जाधव, अभिनय बेर्डे आणि रोहित हळदीकर हे तगडे कलाकार पहिल्यांदाच एकत्र स्क्रीन शेअर करत असून त्यांच्यातील केमिस्ट्री प्रेक्षकांना नक्कीच भावून जाईल. ‘ऑल इज वेल’ या चित्रपटात या तिघांची भूमिका ही फक्त मनोरंजनापुरती मर्यादित नसून, ती आपल्याला मैत्रीच्या खऱ्याखुऱ्या अर्थाकडे घेऊन जाणारी ठरणार आहे. चित्रपटाची कथा मुंबईत पोटापाण्यासाठी आलेल्या तीन मित्रांभोवती फिरते. सुरुवातीला सगळं काही सुरळीत चाललेलं असताना, त्यांच्या आयुष्यात येते एक अनपेक्षित घटना…आणि इथून सुरू होतो एक हसवणारा, विचार करायला लावणारा आणि थेट काळजाला भिडणारा प्रवास! या सिनेमाचं दिग्दर्शन योगेश जाधव यांनी केलं असून लेखन आणि संवादाची माळ प्रियदर्शन जाधव यांनीच गुंफली आहे. वाणीश्री फिल्म प्रॉडक्शन्सच्या बॅनरखाली तयार झालेला हा सिनेमा निर्माते अमोद मुचंडीकर आणि वाणी हालप्पनवर यांनी साकारला आहे.

यात फक्त तिघांचं त्रिकूटच नाही, तर सोबत सयाजी शिंदे, अभिजीत चव्हाण, नक्षत्रा मेढेकर, सायली फाटक, माधव वझे, अजय जाधव, अमायरा गोस्वामी, दिशा काटकर यांसारखे कसलेले कलाकारही महत्त्वाच्या भूमिकांमध्ये झळकणार आहेत. संगीत दिग्दर्शन चिनार-महेश आणि अर्जुन जन्या यांनी केलं असून गाणी स्वरबद्ध केली आहेत रोहित राऊत आणि अपेक्षा दांडेकर यांनी. याशिवाय, छायांकन, संकलन, वेशभूषा आणि साहसदृश्ये अशा तांत्रिक बाबतीतही एक उत्तम टीम या चित्रपटासाठी सज्ज आहे. (All Is Well Marathi Movie)

================================

हे देखील वाचा: ‘एक… दो… तीन’ ते मोहिनी पर्यंतचा प्रवास: Madhuri Dixit च्या स्टारडमचा खास किस्सा!

================================

या चित्रपटाचं वैशिष्ट्य म्हणजे तो केवळ हसवण्यासाठी नाही, तर खऱ्या अर्थाने नात्यांची, विशेषतः मैत्रीची गुंतागुंत दाखवतो. ‘ऑल इज वेल’ म्हणताना या तिघांची धमाल मुंबईच्या गजबजाटात कशी उलगडते, हे सिनेमागृहातच अनुभवायला मिळणार आहे.तेव्हा २७ जून ही तारीख लक्षात ठेवा आणि तयार व्हा या धमाल तिघांच्या भन्नाट मैत्रीचा रंगीबेरंगी प्रवास अनुभवण्यासाठी!