अतिशा नाईक पून्हा साकारणार खलनायिका,’येड लागलं प्रेमाचं’ मालिकेत साकारणार महत्वाची भूमिका

२७ मे पासून स्टार प्रवाहवर ‘येड लागलं प्रेमाचं’ ही नवी मालिका सुरू होत आहे . पंढरपुरच्या मातीत रंगलेली रांगडी प्रेम कहाणी अभुनवण्यासाठी प्रेक्षक उत्सुक आहेत. १७ मार्चला या मालिकेचा पहिला प्रोमो समोर आला होता. एका लोकप्रिय मालिकेची जागा ‘येड लागलं प्रेमाचं’ मालिका घेणार आहे.उत्कंठावर्धक कथानकासोबतच दिग्गज कलाकारांची फौज या मालिकेची आणखी एक जमेची बाजू. राया व मंजिरी या मालिकेतील प्रमुख पात्र आहेत. अभिनेता विशाल निकम रायाच्या भूमिकेत तर मंजिरीच्या भूमिकेत अभिनेत्री पूजा बिरारी पाहायला मिळणार आहेत.(Actress Atisha Naik)

याच बरोबर सुप्रसिद्ध अभिनेत्री अतिशा नाईक या मालिकेतून खलनायिकेच्या रुपात भेटीला येणार आहे. शशीकला असं त्यांच्या व्यक्तिरेखेचं नाव असून  कोणाचही भलं झालेलं तिला आवडत नाही. प्रत्येकाबद्दलच तिच्या मनात एक असूया आहे. अभिनेत्री होण्याचं शशीकलाचं स्वप्न होतं. मात्र हे स्वप्न अधुरच राहिलं. त्यामुळे नटण्याची तिला प्रचंड आवड आहे.स्वार्थी, अप्पलपोटी आणि पैशांचा माज दाखवणारी अशी ही शशीकला साकारताना अभिनेत्री म्हणून कस लागत आहे अशी भावना अतिशा नाईक यांनी व्यक्त केली.

या भूमिकेबद्दल सांगताना त्या म्हणाल्या, ”मी आजवर अनेक खलनायिका साकारल्या. मात्र शशीकलाची बातच न्यारी आहे. तिची घरात प्रचंड दहशत आहे. तिच्या पेहरावातून, चालण्यातून, बोलण्यातून याची कल्पना येते. मला खात्री आहे शशीकलाचा अंदाज प्रेक्षकांना नक्कीच भावेल. शशीकलाच्या दागिन्यांची, तिच्या साड्यांची नक्कीच चर्चा रंगेल. शशीकलाचा मालिकेतली मुख्य नायिका म्हणजेच मंजिरीवर विशेष राग आहे. मंजिरी या घरात नसती तर एव्हाना शशीकलाने संपूर्ण घर आपल्या नावावर करुन घेतलं असतं. मंजिरीच्या सुरळीत होणाऱ्या गोष्टींमधे अडचणी आणून त्या कुटुंबाची कोंडी करायची हे काम शशीकला नेटानं करत असते. ”(Actress Atisha Naik)

==============================

हे देखील वाचा: सत्या आणि मंजूच्या लग्नात झाली अभिनेता किरण गायकवाडची एंट्री आणि उडाला भलताच गोंधळ…

==============================

शशीकलाचे डाव यशस्वी होतात का हे पहायचं असेल तर तुम्हाला ही मालिका पहावी लागेल.‘स्टार प्रवाह’वरील ‘येड लागलं प्रेमाचं’ ही नवी मालिका २७ मेपासून सुरू होणार आहे. सोमवार ते शनिवारी रात्री १०.३० वाजता ही नवी मालिका प्रसारित होणार आहे. सध्या रात्री १०.३० ‘स्टार प्रवाह’वर ‘अबोली’ ही लोकप्रिय मालिका सुरू आहे. त्यामुळे आता २७ मेपासून ‘अबोली’ची जागा ‘येड लागलं प्रेमाचं’ मालिका घेणार आहे.