Swapnil Rajshekhar “आज आमचा सांता जाऊन…” अभिनेते स्वप्नील राजशेखर यांची भावुक पोस्ट
आज मराठी मनोरंजनविश्वात अनेक असे कलाकार (Actor) आहेत, ज्यांना अभिनयाचा वारसा त्यांच्या पूर्वजांकडूनच मिळाला आहे. असेच एक अभिनेते म्हणजे स्वप्नील राजशेखर (Swapnil Rajshekhar). मराठी मनोरंजनविश्वात स्वप्नील यांनी मालिका, चित्रपट, नाटक अशा सर्वच माध्यमांमध्ये काम करत आपला ठसा उमटवला आहे. स्वप्नील हे मराठीमधील सुपरस्टार आणि दिग्गज दिवंगत अभिनेते राजशेखर (Rajshekhar) यांचे चिरंजीव आहेत. (Swapnil Rajshekhar)
अभिनेते राजशेखर यांनी मराठी, हिंदी चित्रपटांमध्ये अनेक उत्तमोत्तम भूमिका साकारत प्रेक्षकांचे मनोरंजन केले. आज त्यांचे चिरंजीव स्वप्नील राजशेखर देखील आपल्या प्रभावी अभिनयाने प्रेक्षकांचे मनोरंजन करत अभिनयाचा वारसा जपत आहे.
आता स्वप्नील यांच्याबद्दल बोलायचे कारण म्हणजे स्वप्नील यांनी सोशल मीडिया वडिलांच्या १९ व्या पुण्यतिथीनिमित्त (Death Anniversary) एक पोस्ट शेअर केली आहे, ज्यामध्ये त्यांनी त्यांच्या वडिलांच्या आठवणींना उजाळा दिला आहे. ही पोस्ट सध्या कमालीची गाजत आहे. जाणून घेऊया स्वप्नील यांनी त्यामध्ये काय लिहिले आहे.
“आज एकोणीस वर्ष झाली आमचा सांता जाऊन…
काळ सरत राहिला, वर्ष उलटत राहीली.. आयुष्य पुढे सरकत राहिलं…सुखदुःख येत राहिली…२५ डिसेंबर २००५ च्या सकाळी पोटात आणि आयुष्यात पडलेला खड्डा आजही तसाच आहे..तो भरला नाही, भरणारही नाही कधी…
डोक्यावरचं आभाळ फाटलं, पाया खालची जमीन निसटली, पोकळी निर्माण झाली “ या आणि अशा पुस्तकी उपमा किती थिट्या आहेत हे क्षणोक्षणी जाणवावं असं फिलींग आहे आपला बाप या जगात नसण्याचं…
गेली १९ वर्ष सतत एक विचार मन पोखरत रहातो की…पप्पा होते तेव्हा किती संधी होती माझ्याकडे त्यांना भरभरून भेटायची, बोलायची, त्याना स्वतःमधे साठवुन घेण्याची…
आणि किती निरर्थक, निरुपयोगी आणि भंगार गोष्टीत वेळ घालवला असेल मी पप्पा हयात असताना त्यांना वेळ न देता…
उद्या कधी टाईम ट्रॅव्हल शक्य झाला तर मी त्यांचं जाणं थांबवणार नाही कदाचीत, पण त्याआधीचा मॅक्सीमम काळ पप्पांच्या बरोबर घालवेन… त्यांचा स्पर्श आणखी आणखी साठवेन स्मृतीत…तो उबदार आश्वासक स्पर्श..
“मी आहे रे.. तु जिंकलास, हरलास, पडलास, चुकलास, माती खाल्लीस, रडलास,.. सगळ्यात मी आहे तुझ्याबरोबर” हे सांगणारा..पण च्यायला.. ही सगळी पश्चात बुध्दी आहे…
एरवी माणसाचं असणं गृहीतच धरतो आपण..
असो.. पप्पा तसे सोबत आहेत म्हणा..गरजेच्या वेळी डोळे मिटुन हात पुढे केला की त्यांचा स्पर्श हातात शब्दशः जाणवतो..सुदैवाने तेवढी पोतडी भरलेलीय आपली…बाकी तो चलता है.. दुनिया है..पण १९ वर्षात एक झालंय, कोणाचेही आईवडील गेल्याचं कळलं, की माझ्याही आतमधे तुटतं काहीतरी… त्याच्याबद्दल कणव दाटुन येते..
हल्लीच एका सुहृदाचे वडील गेले..मी ठरवुन बऱ्याच दिवसांनी भेटलो त्याला..बाकी काही बोलण्यासारखं नव्हतच..मी त्याच्या पाठीवर हात ठेवुन “welcome to the club” म्हणालो…
तो खोल बघत राहिला माझ्याकडे…”
स्वप्नील यांच्या या पोस्टवर अनेकांनी कमेंट्स करत राजशेखर यांना श्रद्धांजली वाहिली आहे. सोबतच राजशेखर यांच्यावरील एक कलाकार म्हणून असलेले प्रेम देखील व्यक्त केले आहे. सध्या स्वप्नील यांची ही पोस्ट खूपच व्हायरल झाली आहे.
स्वप्नील राजशेखर यांच्याबद्दल सांगायचे झाले तर त्यांनी आतापर्यंत अनेक मालिका, चित्रपट आणि नाटकांमध्ये काम केले आहे. स्वप्नील हे उत्तम अभिनेते असण्यासोबतच ते चांगले लेखक आणि दिग्दर्शक देखील आहेत.