Umesh Bane ‘मराठी कलाकारांची अवस्था भिकाऱ्यासारखी’ प्रसिद्ध कलाकाराने पोस्ट शेअर करत सांगितली आपबिती
जे लोकं काम करतात त्यांना सगळ्यांनाच काम करताना काही ना काही समस्या येतात. प्रत्येकाचे आपल्या कामाच्या ठिकाणचे काही प्रॉब्लेम आणि टेन्शन असतात. आपल्याला असे वाटते कलाकारांचे बरे आहे त्यांना कसे टेन्शन नाही, प्रॉब्लेम नाही. भरपूर पैसा, नेम, फेम मात्र असे नाही. हे फक्त वर वर दिसण्यासाठी कलाकारांना देखील त्यांच्या कामाच्या बाबतीत अनेक त्रास असतात. फक्त याबद्दल जास्त बोलले जात नाही. (Marathi Entertainment News)
अनेकदा आपण कलाकारांच्या समस्यांबद्दल ऐकत असतो. कलाकारांना काम करताना होणारे त्रास, पेमेंट प्रॉब्लेम, कामाचे तास आदी अनेक गोष्टी कलाकारांसाठी डोकेदुखी असतात. याबद्दल बरेच कलाकार विविध मुलाखतींमध्ये बोलतात मात्र त्यावर तोडगा कधीच निघत नाही. आता पुन्हा एकदा हा विषय निघण्याचे कारण म्हणजे सोशल मीडियावरील पोस्ट. (Umesh Bane)
अभिनेते उमेश बने (Umesh Bane) महाराष्ट्रातील मालिका कलावंतांची बिकट स्थिती आणि त्यांच्या अवस्था ही राज्यातील भिकाऱ्यासारखी आहे, असं म्हणत एक पोस्ट शेअर केली आहे. या पोस्टमध्ये त्यांनी कलाकारांना कोणकोणत्या संकटाना सामोरे जावे लागत आहे, याबद्दल स्पष्ट्च लिहिले आहे. कलाकारांचे अनेक प्रॉब्लेम सध्या आहेत, त्यामुळे हे सर्व प्रॉब्लेम सोडवण्यासाठी त्यांनी मुख्यमंत्री देवेंद्र फडणवीस यांच्याकडे मदत मागितली आहे.
उमेश यांनी त्यांच्या पोस्टमध्ये लिहिले, “माननीय मुख्यमंत्री देवेद्र फडणवीस साहेब राज्यातल्या भिकाऱ्यासारखीच महाराष्ट्रातील मालिका कलावंतांची अवस्था आहे. तब्बल ९० दिवसानंतर मिळणारं पेमेंटही वेळेवर मिळत नाही. इन्कम टॅक्सच्या नावाखाली टीडीएस कट केला जातो, तो वेळेवर भरला जात नाही. हाताच्या बोटावर मोजण्याइतपत प्रॉडक्शन हाऊस सोडली तर इतर ठिकाणी कलावंतांचे हालच, काही ठिकाणी खाण्याची व्यवस्था वाईट.
शिफ्टची वेळ ठरलेली असूनसुद्धा कोणताही अतिरिक्त मोबदला न घेता कलाकार रात्री उशिरापर्यंत शूटिंग करतो. तरी त्याला ९० दिवसांनी मिळणारे मानधन वेळेवर मिळत नाही. तुम्ही माहितीच्या आधाराखाली सगळ्या प्रॉडक्शन हाऊसचे अकाउंट चेक करा, सत्य समोर येईल. काही जणांच्या मानसिकतेच एवढं खच्चीकरण झालंय की, त्यांनी आत्महत्येच्या पोस्ट टाकल्या.
उद्या हा विषय पेट घेण्याआधी कृपया महाराष्ट्रातल्या, देशभरातल्या कलावंतांसाठी विधानसभेत आणि लोकसभेत हा विषय चर्चेला घ्या. कलाकारांना वेळेवर मानधन मिळालं पाहिजे त्यांच्या हिताचं रक्षण झालं पाहिजे असा GR काढून तो चॅनल आणि निर्मात्यांना बंधनकारक करा,”
==============
हे देखील वाचा : Aadesh Bandekar : नाटकांपासून सुरु झालेला महाराष्ट्राच्या लाडक्या ‘भावोजींचा’ अभिनय प्रवास
==============
ही पोस्ट शेअर करताना त्यांनी कॅप्शनमध्ये लिहिले, “कलाकार म्हणून मी माझी व्यथा मांडलीय जी सत्य आहे,तुम्ही दिग्दर्शक,तंत्रज्ञ कला क्षेत्रातले अजूनही कुणी अन्यायाने पीडित असाल,तर व्यक्त व्हा स्वतःची पोस्ट टाका, आपलं म्हणन, राज्यातल्या मुख्यमंत्र्यांन पर्यंत पोहचवा.” दरम्यान उमेश यांनी अनेक नाटकांमध्ये काम केले असून त्यांनी काही मालिकांमध्ये देखील काम केले आहे. येऊ कशी कशी मी नांदायला आणि तुझेच मी गीत गात आहे या त्यांच्या गाजलेल्या मालिका आहेत.