फत्तेशिकस्तमधील केसरची तयारी फर्जंद पासूनच सुरु झाली होती – मृण्मयी देशपांडे

महाराष्ट्रातील तमाम प्रेक्षकांची आवडती अभिनेत्री मृण्मयी देशपांडे ही अष्टपैलू आहे असं म्हंटल तर खोटं ठरणार नाही. तिच्या अभिनय कौशल्याने तिने प्रेक्षकांची मनं जिंकली. २०१९ मध्ये फत्तेशिकस्त या चित्रपटात ती केसर या भूमिकेतून प्रेक्षकांच्या भेटीस आली. या भूमिकेसाठी तिने प्रचंड मेहनत घेतली, शिवकालीन भाषा आणि तलवार बाजीचं प्रशिक्षण देखील घेतलं. फत्तेशिकस्त मधली ही केसर आता झी टॉकीजवर प्रेक्षकांच्या भेटीस येणार आहे. १६ ऑगस्टला या चित्रपटाचा वर्ल्ड टेलिव्हिजन प्रीमियर झी टॉकीजवर होणार आहे आणि त्या निमित्ताने मृण्मयीसोबत साधलेला हा खास संवाद

१. या ऐतीहासीक चित्रपटातील भूमिकेसाठी जेव्हा तुम्हाला विचारण्यात आलं तेव्हा तुमची प्रतिक्रिया कशी होती?

• फर्जंद नंतर लगेचच दिग्पालने फत्तेशिकस्तची जुळवा जुळव सुरु केली. मला माहित होतं की केसरची भूमिका मला परत करायला मिळणार आहे. त्यामुळे मी खूप उत्सुक होते. त्याने मला सांगितलं होतं कि फत्तेशिकस्त मधील केसर थोडी वेगळी असणार आहे.आणि त्या मुळे उत्सुकता अजुनच वाढली होती.

२. तुमच्या चित्रपटातील भूमिकेसाठी तुम्ही कशी तयारी केली?

• फत्तेशिकस्त मधील केसर आणखी नवखी होती. तिने एखादी चूक जर केली तर त्याची किंमत तिला एकटीलाच नाही तर सर्वानाच भोगावी लोणार होती. अशा परिस्थितीमध्ये बहिर्जी नाईकांनी तिला सहभागी करून घेतल होतं. फत्तेशिकस्तमधील केसरची तयारी तशी फर्जंद पासूनच सुरु झाली होती. मी संहिता वाचल्यावर त्या भूमिकेची गाभा मला कळाला.

३. या चित्रपटाच्या शूटिंग दरम्यानचा एखादा अविस्मरणीय किस्सा सांगा

• या चित्रपटातील एक सीनच माझ्यासाठी अविस्मरणीय क्षण आहे. जेव्हा केसर पकडली जाईल कि काय अशी भीती निर्माण होते आणि भटारखान्यात नामदारखान जेव्हा केसरचा गळा धरतो तेव्हा मला वेग वेगळे हावभाव एकाच वेळेस दयायचे होते. हा अवघड सीन आम्ही शूट केला आणि तो पहिल्याच टेक मध्ये व्यवस्थित शूट झाला. दिग्पाल आणि माझा अत्यंत आवडीचा हा प्रसंग होता.

४. चित्रपट रिलीज झाल्यानंतर मिळालेली सगळ्यात मोठी कॉम्प्लिमेंट .?

• बहिर्जी नाईक आणि केसर यांच्या भूमिका विशेष लक्षात राहिल्या असं बऱ्याच लोकांकडून सांगण्यात आलं. आणि मी आधी सांगितलेला सीन त्याचं कौतुक खूप लोकांनी केलं.

५. या चित्रपटाने बॉक्सऑफिस तर गाजवलंच पण आता पहिल्यांदाच हा चित्रपट प्रेक्षक घरबसल्या झी टॉकीजवर पाहू शकतील, तुम्ही प्रेक्षकांना काय आवाहन कराल ?

• झी टॉकीज महाराष्ट्राच्या कानाकोपऱ्यात पोहोचलेली वाहिनी आहे. झी टॉकीज वरील चित्रपट प्रेक्षकांनी नेहमीच दर्जेदार चित्रपट म्हणून स्वीकारलेले आहेत. महाराष्ट्रातील प्रेक्षकांना झी टॉकीज च्या मार्फत फत्तेशिकस्त बघायला मिळणं ही एक पर्वणीच आहे. छत्रपती शिवाजी महाराजांचा आणि त्यांच्या शूरवीर मावळ्यांचा पराक्रम प्रेक्षकांना बघायला मिळणार आहे. ही संधी कोणीच सोडू नये अशी विनंती मी सगळ्यांना करते.