Paresh Rawal यांचं पुन्हा एकदा मराठी नाटकांवरील प्रेम आलं समोर; प्रेक्षकांसोबत बसून पाहिलं ‘हे’ नाटक
मराठी चित्रपट आणि नाट्यसृष्टीला अमराठी कलाकार आणि रसिक प्रेक्षकांनी कायमच प्रेम दिलं आहे. अमिताभ बच्चन (Amitabh Bachchan) पासून ते अगदी रजनीकांत (Rajinikanth) यांच्यापर्यंत मराठी नाटक, चित्रपटांचं कौतुक बऱ्याच कलाकारांनी आजवर केलं आहे. अशातच ज्येष्ठ अभिनेते परेश रावल यांनी पुन्हा एकदा मराठी नाटकाचं विशेष कौतुक करत नाटकाचा प्रयोगही आवर्जून पाहिला आहे. बरं, परेश रावल (Paresh Rawal) हे मराठी नाटकांचे चाहते आहेत आणि त्यांनी बऱ्याच मुलाखतींमधून त्याचा उल्लेख केला आहेच. काही महिन्यांपूर्वी त्यांनी प्राजक्त देशमुख लिखित ‘संगीत देवबाभळी’ नाटकाचं कौतुकही त्यांनी एका हिंदी मुलाखतीत आवर्जून केलं होतं. आता नुकतंच मुंबईतील दादर येथे मराठी नाटकांच्या फेस्टिवलला त्यांनी हजेरी लावत प्रेक्षकांमध्ये बसून त्यांनी मराठी नाटकाचा आनंद घेतला.
दादरमधील यशवंतराव चव्हाण नाट्यगृह येथे मराठी नाटकांचं फेस्टिवल आयोजित करण्यात आलं होतं. यावेळी आनंद इंगळे यांच्या ‘पॉपकॉर्न’ (Popcorn) या मराठी नाटकाच्या प्रयोगाला परेश रावल यांनी हजेरी लावली होती. सर्वसामान्यांप्रमाणे ते नाटकाचा आनंद घेत असतानाचा व्हिडिओ सध्या सोशल मिडियावर व्हायरल झाला आहे. या व्हिडिओत दिसतं की त्यांच्या बाजूला गीतकार स्वानंद किरकिरे, लेखक-दिग्दर्शक विजय केंकरे देखील बसले आहेत. (Marathi Natak)
================================
हे देखील वाचा : परेश रावल… बहुरंगी, बहुआयामी, अष्टपैलू व्यक्तिमत्त्व!!
================================
दरम्यान, ‘पॉपकॉर्न’ हे नाटक विवेक बेळे यांनी लिहिलं असून याचं दिग्दर्शनही केलं आहे. नाटकात आनंद इंगळेंसह अंबर गणपुले, गायत्री देशपांडे, गौरी देशपांडे, दिप्पी लेले हे कलाकार आहेत. ‘पॉपकॉर्न:फॅमिली मॅटर्स’ असं नाटकाचं नाव आहे. परेश नुकतेच ‘थामा’ चित्रपटात दिसले होते. तसेच, लवकरच ‘हेरा फेरी ३’ (Hema Pheri 3), ‘वेलकम टु द जंगल’ या कॉमेडी चित्रपटांत दिसणार आहेत. या आधी देखील हिंदीतील अनेक कलाकारांनी मराठी नाटकांचं विशेष कौतुक केलं आहे. अभिनेत्री तब्बू हिने ‘२ वाजून २२ मिनिटं’ या नाटकाचा प्रयोगाला हजेरी लावत कलाकारांच्या अभिनयाला दाद दिली होती. (Entertainment News)
Get Latest Marathi Entertainment update | Movies Reviews in Marathi | Celebrities Update in Marathi