Lagnacha Shot Movie: छोट्या पडद्यावरील लोकप्रिय चेहरे अभिजीत-प्रियदर्शिनी आता मोठ्या पडद्यावर एकत्र झळकणार!
मराठी टेलिव्हिजन विश्वातून घराघरात पोहोचलेले अभिजीत आमकर (Abhijit Amkar) आणि प्रियदर्शिनी इंदलकर (Priydarshini Indalkar) आता पहिल्यांदाच चित्रपटात एकत्र झळकणार आहेत. प्रेक्षकांनी टीव्ही मालिकांमधून भरभरून प्रेम दिलेल्या या दोन्ही कलाकारांची जोडी आगामी मराठी चित्रपट ‘लग्नाचा शॉट’ (Lagnacha Shot) मधून मोठ्या पडद्यावर पदार्पण करत आहे. या चित्रपटाचे दिग्दर्शन अक्षय गोरे यांनी केले आहे. प्रियदर्शिनी इंदलकर याआधी अनेक गाजलेल्या मराठी चित्रपटांचा भाग राहिली असली, तरी टेलिव्हिजनमधून लोकप्रिय झालेल्या अभिनेत्यासोबत ती पहिल्यांदाच मुख्य भूमिकेत दिसणार आहे. त्यामुळे या चित्रपटाच्या निमित्ताने मराठी सिनेसृष्टीला एक नवी आणि वेगळी जोडी पाहायला मिळणार आहे.(Lagnacha Shot Movie)
या चित्रपटाबाबत बोलताना प्रियदर्शिनी म्हणाली की, हा तिच्यासाठी एक वेगळाच अनुभव ठरला. रोमँटिक धाटणीचा सिनेमा आणि त्यात भावनिक तसेच प्रेमळ क्षण साकारण्याची संधी तिला पहिल्यांदाच मिळाली. चित्रपटातील गाणेही लवकरच प्रेक्षकांसमोर येणार असून, या गाण्यातील अनुभव तिच्यासाठी खास असल्याचे ती सांगते. सहकलाकार म्हणून अभिजीतसोबत काम करताना संपूर्ण चित्रीकरण काळात सुरक्षितता आणि सहजता जाणवली, असेही ती नमूद करते. तालमींना महत्त्व देणारी कलाकार म्हणून प्रत्येक सीन अधिक चांगला व्हावा यासाठी दोघांमध्ये उत्तम समन्वय होता, असे तिचे मत आहे.
अभिजीत आमकरसाठी हा चित्रपट देखील तितकाच महत्त्वाचा आहे. रंगभूमीपासून अभिनयाची सुरुवात करून विविध माध्यमांतून प्रवास करणाऱ्या अभिजीतने या सिनेमातही तितक्याच प्रामाणिकपणे काम केल्याचे तो सांगतो. लहान पडदा असो वा मोठा, मेहनतीत फरक नसतो, हा त्याचा ठाम विश्वास आहे. प्रियदर्शिनीसोबत काम करताना तिची एकाग्रता आणि अभिनयाची शैली विशेष आवडल्याचेही तो सांगतो. कथेत दोन अनोळखी व्यक्तींच्या नात्याची गोष्ट असल्यामुळे त्यांच्यातील केमिस्ट्री महत्त्वाची होती आणि ती पडद्यावर प्रभावीपणे उमटली असल्याचा विश्वास अभिजीत व्यक्त करतो. (Lagnacha Shot Movie)
=================================
=================================
‘लग्नाचा शॉट’ हा चित्रपट महापर्व फिल्म्स आणि जिजा फिल्म कंपनीच्या बॅनरखाली साकारला असून, अक्षय गोरे यांनी या चित्रपटाचे लेखन आणि दिग्दर्शन केले आहे. संगीताची जबाबदारी प्रवीण कोळी आणि योगिता कोळी यांनी सांभाळली आहे. अक्षय महादेव गोरे, विजय महादेव गोरे, अभिषेक उत्कर्ष कोळी आणि सुरेश मगनलाल प्रजापती हे या चित्रपटाचे निर्माते आहेत. हा बहुप्रतिक्षित चित्रपट ६ फेब्रुवारी रोजी प्रेक्षकांच्या भेटीला येणार असून, टीव्हीवरील लोकप्रिय कलाकारांची मोठ्या पडद्यावरील केमिस्ट्री अनुभवण्याची उत्सुकता चाहत्यांमध्ये निर्माण झाली आहे.