‘अबोल प्रीतीची अजब कहाणी’तून राजवीर आणि मयूरी ही नवी जोडी प्रेक्षकांच्या भेटीला
हल्ली निरनिराळे विषयांवर आधारित आणि रंजक मालिका आपल्यासमोर दाखल होत आहेत. मालिकेतील काही व्यक्तिरेखा कायमच प्रेक्षकांच्या मनात घर करून राहतात. आता लवकरच प्रेक्षकांच्या भेटीला सोनी मराठी वाहिनी एक नवी कोरी मालिका घेऊन येत आहे. ‘अबोल प्रीतीची अजब कहाणी’ ही मालिका प्रेक्षकांच्या भेटीला येते आहे. त्याची पहिली झलक प्रेक्षकांच्या विशेष पसंतीस पडताना पहायला मिळत आहे. प्रेक्षकांचा लाडका अभिनेता अजिंक्य राऊत या नव्या मालिकेतून प्रेक्षकांच्या भेटीला येणार आहे. आणि त्याच्या व्यक्तिरेखेचं नाव राजवीर आहे. त्याच्याबरोबर गुणी अभिनेत्री जान्हवी तांबट हीसुद्धा या मालिकेतून विशिष्ट व्यक्तिरेखा साकारताना पाहायला मिळेल. तिच्या व्यक्तिरेखेचं नाव मयूरी असून ती या मालिकेत बॉडीगार्डच्या वेशातसुद्धा आपल्याला पाहता येणार आहे. आता या दोघांची अजब प्रेमकहाणी कशी असेल, हे लवकरच आपल्याला ‘अबोल प्रीतीची अजब कहाणी’ या मालिकेतुन पहायला मिळेल.(Abol Preetichi Ajab Kahani Serial)
अभिनेता अजिंक्य राऊत पुन्हा एकदा एका नव्या मालिकेतून प्रेक्षकांच्या भेटीला येतो आहे. त्याचे याआधीचे काम प्रेक्षकांना विशेष आवडले. त्याच्या नव्या भूमिकेची त्याचे चाहते मनापासून वाट पाहत होते. या नव्या मालिकेचा फर्स्ट लूक प्रेक्षकांना विशेष आवडतो आहे, कारण मालिकेची नायिका जान्हवी तांबट ही सुद्धा यामध्ये वेगळ्या रूपात दिसते आहे. ती चक्क एका बॉडीगार्डच्या वेशात आपल्याला दिसते आहे, तेही पुरुष बॉडीगार्डच्या वेशात. जान्हवी साठी मयुरी आणि भाऊसाहेब या दोन व्यक्तिरेखा साकारणं हे तारेवरची कसरत ठरणार आहे. आता हा बॉडीगार्ड कशा प्रकारे प्रेक्षकांसमोर येईल, हे पाहणे उत्सुकतेचे असेल.
या मालिकेतून दिग्गज कलाकारांची फळी प्रेक्षकांच्या भेटीला येणार आहे. अजिंक्य राऊत, जान्हवी तांबट, सुनील तावडे आणि दीप्ती केतकर हे कलाकार प्रमुख भूमिकेत या मालिकेतून पाहायला मिळतील. मालिकेचे शीर्षक गीत गुरू ठाकूर यांनी लिहले असून रोहित राऊत आणि जुईली जोगळेकर यांनी ते गायले आहे. प्रेक्षकांना ताल धरायला लावणारे हा शीर्षक गीत असून रोमँटिक असलेले हे शीर्षक गीत रसिकांच्या मनात घर करते आहे.(Abol Preetichi Ajab Kahani Serial)
==============================
हे देखील वाचा:Jawan Teaser: शाहरुख खानच्या बहुप्रतीक्षित ‘जवान’ सिनेमाचा धमाकेदार टीजर रिलीज
==============================
अजय मयेकर हे या मालिकेचे दिग्दर्शन करत आहेत आणि त्यांच्या अजय मयेकर फिल्म्स या निर्मिती संस्थेकडून या मालिकेची निर्मिती करण्यात येत आहे. सोनी मराठीवर ‘अबोल प्रीतीची अजब कहाणी’ ही मालिका आपल्याला १७ जुलैपासून संद्याकाळी ७.३० वाजता पहायला मिळणार आहे.
