आध्यात्मिक गुरु ओशो रजनीश यांच्यावरील चित्रपटात हा अभिनेता साकारणार ‘ओशोंची’ भूमिका….

आध्यात्मिक गुरु ओशो रजनीश यांच्याभोवती कायम गूढ वलय राहीलं आहे. आजही ओशो यांच्याबद्दलची उत्सुकता कमी झाली नाही. हे जाणून ओशो यांचे भक्त असलेले वेलजी भाई गाला यांनी ओशोंवर आधारित चित्रपट काढला आहे. अभिनेते रवी किशन यात ओशोंच्या भूमिकेत दिसणार आहेत. या चित्रपटाचे बहुतांशी चित्रिकरण पूर्ण झाले असून एप्रिलच्या अखेरच्या आठवड्यात किंवा मे मध्ये ‘सीक्रेट्स ऑफ लव’ हा चित्रपट प्रदर्शित होणार आहे. 

आध्यात्मिक गुरु ओशो रजनीश यांच्या आयुष्याबाबत सर्वसामान्यांच्या मनात कायम उत्सुकता असते. हे जाणूनच बॉलिवूडमध्ये ओशो यांच्या जीवनावर चित्रपट काढण्याचा प्रयत्न झाला.

हे देखील वाचा: नाना पाटेकर – आपला माणूस

दिग्दर्शक शकून बत्रा आणि करण जोहर सारख्या मान्यवरांनी याबाबत प्रयत्न सुरु केले होते. या बीग बजेट चित्रपटात अमिर खान आणि आलिया भट्ट सारखे मल्टीस्टार असणार अशी चर्चा होती. मात्र या सर्वांत बाजी मारली ती रवी किशन या अभिनेत्याने. रवी किशन (Ravi Kishan) यांच्याबरोबरच अन्य काही मान्यवर अभिनेत्यांचाही या भूमिकेसाठी विचार करण्यात आला होता. पण या सर्वांना मागे टाकून रवी किशन यांनी ही महत्त्वपूर्ण भूमिका मिळवली. 

या चित्रपटाचे निर्माते वेलजीभाई गाला हे ओशो रजनीश यांचे भक्त आहेत. गेली तीस वर्ष गाला हे ओशो यांचे अनुयायी आहेत. त्यामुळे ओशो (Osho Rajneesh) यांनी दिलेली प्रवचने,  त्यांचे मेडिटेशन याबाबत त्यांना पूर्ण माहिती आहे. ओशोंचे विचार आजच्या पिढीसाठी मार्गदर्शक आहेत. ते या पिढीपर्यंत पोहचण्यासाठी चित्रपट हे प्रभावी माध्यम होऊ शकेल, हे जाणून आपण ‘सीक्रेट्स ऑफ लव’ या चित्रपटाची निर्मीती केल्याची माहिती गाला यांनी दिली. या चित्रपटात ओशो यांच्या जीवनातील प्रमुख तीन टप्पे दाखवण्यात येणार आहेत.  

जयेश कपूर, विवेक मिश्रा आणि रवी किशन हे अभिनेते या तीन टप्प्यात असतील. ओशो राजनीश यांच्यावर अमेरिकेत विष प्रयोग करण्यात आला होता, या प्रसंगात रवी किशन यांनी साकारलेल्या ओशोंच्या भूमिकेचे गाला यांनी कौतुक केले आहे. मुंबई, गुजरात, गोवा, काशी, जबलपूर या भागात सिक्रेट्स ऑफ लवचे चित्रिकरण करण्यात आले आहे. लॉकडाऊनचा फटका या चित्रपटालाही बसला. त्यामुळे 2020 मध्ये प्रदर्शित होणारा ‘सिक्रेट्स ऑफ लव’आता एप्रिल किंवा मे मध्ये प्रेक्षकांच्या भेटीस येणार आहे.