Vicky Kaushal-Katrina Kaif यांनी अखेर आपल्या लेकाचं नाव केलं रिव्हील,
अखेर Shashank Ketkar ने स्क्रिन शॉट्ससह शेअर केलं 5 लाख बुडवणाऱ्या ‘त्या’ निर्मात्याच नाव !
मराठी टेलिव्हिजन विश्वातील अभिनेता शशांक केतकर (Shashank Ketkar) गेल्या काही वर्षांपासून एका गंभीर आर्थिक प्रश्नाला सामोरे जात असल्याची चर्चा होती. मात्र आता त्याने थेट सोशल मीडियावर येत आपल्यावर झालेल्या अन्यायाची सविस्तर माहिती, पुराव्यांसह मांडली आहे. शशांकने सांगितले की, ‘हे मन बावरे’ (He Man Bavare) या मालिकेच्या कामासाठी मिळणारी रक्कम आजही पूर्णपणे अदा करण्यात आलेली नाही. जवळपास ५ लाख रुपयांचा व्यवहार अनेक वर्षांपासून प्रलंबित असून, वारंवार पाठपुरावा करूनही फक्त आश्वासनंच मिळाली, असा त्याचा आरोप आहे. (Shashank Ketkar)
अभिनेत्याने स्पष्ट केलं की, प्रत्यक्ष पैसे देताना त्याच्या मानधनातून TDS कापण्यात आला, मात्र तो सरकारकडे जमा झाल्याचा कोणताही पुरावा आजतागायत मिळालेला नाही. ही बाब केवळ स्वतःपुरती मर्यादित नसून, इतर कलाकारांच्याही बाबतीत असेच प्रकार घडल्याचा दावा शशांकने केला आहे.
सोशल मीडियावर शेअर केलेल्या पोस्ट आणि व्हिडिओमध्ये त्याने संवादांचे स्क्रीनशॉट्सही दाखवले असून, गेल्या पाच वर्षांपासून “आज देतो, उद्या देतो” अशा कारणांमुळे हा विषय लांबत गेला, असं त्याने सांगितलं. अखेर संयमाचा अंत झाल्यानंतरच आपण हे सगळं उघडपणे मांडत असल्याचं शशांकने नमूद केलं.
महत्त्वाचं म्हणजे, संपूर्ण इंडस्ट्रीवर बोट न ठेवता शशांकने स्पष्ट शब्दांत सांगितलं की सगळेच निर्माते असे नसतात. अनेक प्रामाणिक निर्माते वेळेवर मानधन देतात आणि कलाकारांचा सन्मान राखतात. मात्र, अशा काही अनुभवांमुळे कलाकारांची मानसिक आणि आर्थिक कुचंबणा होते, याकडे दुर्लक्ष करता येणार नाही, असं त्याचं मत आहे. (Shashank Ketkar)
============================
============================
शशांकच्या या धाडसी भूमिकेला अभिनेता आस्ताद काळे यानेही पाठिंबा दर्शवला असून, कलाकारांना भेडसावणाऱ्या आर्थिक अडचणींबाबत त्यानेही सोशल मीडियावर परखड मत मांडलं आहे. यामुळे मराठी मनोरंजनसृष्टीत हा विषय पुन्हा एकदा चर्चेच्या केंद्रस्थानी आला आहे.