अ‍ॅव्हेंजर्स सिरीजमधील सुपरहिरो जेरेमीचा अपघात

जेरेमी ली रेनर….मार्वल स्टार जेरेमी रेनर एका भीषण अपघातात गंभीर जखमी झाला आहे. जेरेमीली (Jeremy Renner) त्वरित हेलिकॉप्टरच्या सहाय्यानं रुग्णालयात दाखल करण्यात आलं आणि त्याच्यावर शस्त्रक्रियाही करण्यात आली. विशेष म्हणजे हा सुपरस्टार, अ‍ॅव्हेंजर्स सिरीजमधील सुपरहिरो जेरेमी घरावरील बर्फ साफ करतांना जखमी झाला आहे. घरावर साठलेला बर्फ साफ करताना जेरेमीचा (Jeremy Renner) पाय घसरला आणि तो पडला. वरवर साध्या वाटणा-या या अपघातात जेरेमीला बराच मार लागला आहे. त्याच्या पाठीलाही गंभीर दुखापत झाली आहे. ही अपघाताची बातमी आल्यावर काही काळ जेरेमीच्या चाहत्यांना हा पब्लीसिटीचा स्टंट आहे की काय, अशी शंका आली होती. कारण जेरेमीचा चित्रपट 15 जानेवारी रोजी प्रदर्शित होत आहे. पण नंतर जेरेमीनं आपले हॉस्पिटलमधील फोटो सोशल मिडीयावर शेअर केल्यावर त्याच्या चाहत्यांनी टेक केअर जेरेमी या शुभेच्छा देत आपल्या लाडक्या अभिनेत्याला लवकर बर वाटू दे अशी प्रार्थना केली आहे.  

हॉलिवूड अभिनेता जेरेमी रेनर (Jeremy Renner) नुकताच एका भीषण अपघाताला बळी पडला. वीकेंडला जेरेमी त्याच्या घराभोवतीचा बर्फ साफ करण्याचा प्रयत्न करत होता. यादरम्यान त्याच्यासोबत हा अपघात झाला. या अपघातात जेरेमी रेनरला अनेक दुखापती झाल्याचं सांगण्यात येत आहे. त्याला लगेच हेलिकॉप्टरच्या सहाय्यानं स्थानिक रुग्णालयात दाखल करण्यात आले आहे. जेरेमीच्या प्रवक्त्याने जेरेमीची प्रकृती सध्या गंभीर पण स्थिर असल्याचे सांगितले आहे. या अपघातात त्याचा प्रवक्ताही जखमी झाला आहे. सध्या जेरेमीसोबत त्याचे कुटुंब रुग्णालयात असून त्याच्यावर शस्त्रक्रीयाही करण्यात आली आहे. असे असले तरी जेरेमी काही आठवडे हॉस्पिटलमध्ये रहाण्याची शक्यता आहे. अभिनेता जेरेमीचे(Jeremy Renner) घर माउंट रोझ-स्की टाहो येथे आहे. लेक टाहो येथील ग्रामीण भागातील या घरी सर्व जेरेमीचे कुटुंबिय सुट्टी घालवण्यासाठी येथे जातात. नवीन वर्षाच्या पूर्वसंध्येला त्या भागात जोरदार बर्फवृष्टी झाली. आसपास सर्व भाग बर्फानं झाकला गेला. अशात घरावर जमा झालेला अतिरिक्त बर्फ काढण्यासाठी स्वतः जेरेमी घरावर चढल्याचे सांगण्यात येते. चित्रपटात सुपर स्टंट करणारा हा सुपरहिरो प्रत्यक्षात मात्र बर्फाच्या मा-यापुढे स्वतःला रोखू शकला नाही. त्याचा पाय घसरला आणि त्याच्या पाठीला जबर दुखापत झाली.  

‘जेरेमी रेनर’ (Jeremy Renner) हा प्रसिद्ध हॉलिवूड अभिनेता आहे.  जेरेमीला दोनदा ऑस्करसाठी नामांकनही मिळाले आहे. ‘द हर्ट लॉकर’ आणि ‘द टाऊन’ सारख्या चित्रपटांमध्ये त्याच्या उत्कृष्ट अभिनयासाठी नामांकनही मिळाले होते. जेरेमी रेनर गेल्या वर्षी मे महिन्यात भारतात आला होता. राजस्थानमध्ये त्यानं भेट दिली होती. तेव्हा त्याच्यासोबत बॉलिवूड अभिनेते अनिल कपूरही होते. जेरेमी आणि अनिल कपूर यांनी राजस्थानमधील मुलांसोबत क्रिकेट खेळण्याचा आनंदही घेतला होता. जेरेमीचा अपघात झाल्यावर अनिल कपूरनं त्याला सोशल मिडीयाच्या माध्यमातून टेक केअरचा संदेश दिला आहे.  

=======

हे देखील वाचा :  सलीम जावेद यांनी रातोरात पेंटर कडून काय रंगवून घेतले?

=======

जेरेमीच्या (Jeremy Renner) अनेक चाहत्यांनी आता त्याच्या तब्बेतीसाठी शुभेच्छा संदेश पाठवायला सुरुवात केली आहे.  सध्या जेरेमी त्याच्या घराजवळील एका  रुग्णालयात आहे.  या रुग्णालयात त्याच्यावर आवश्यक असे उपचार करण्यात आले आहेत.  मात्र या रुग्णालयात जेरेमीच्या चाहत्यांची गर्दी होऊ नये, अशी विनंतीच त्याच्या कुटुंबियांकडून करण्यात येत आहे. जेरेमीनंही आपला स्वतःचा रुग्णालयातील फोटो सोशल मिडीयावर शेअर केला असून मी ठिक आहे, आणि माझ्यासाठी तुम्हा सगळ्यांच्या शुभेच्छा औषधांसारख्या  गुणकारी असल्याचे म्हटले आहे.  एकूण सध्या हा सुपरहिरो काही दिवस तरी आराम करणार आहे.