Bigg Boss Marathi 6 च्या घरात होणार Sagar Karande ची एंट्री?; सोशल मीडियावरील पोस्टमुळे चर्चांना उधाण !
Bigg Boss Marathi च्या सहाव्या पर्वाची अधिकृत घोषणा होताच प्रेक्षकांमध्ये उत्सुकतेचं वातावरण निर्माण झालं आहे. यंदा या लोकप्रिय रिअॅलिटी शोचं सूत्रसंचालन अभिनेता रितेश देशमुख (Ritesh Deshmukh) करणार असल्याने या पर्वाकडे विशेष लक्ष वेधलं जात आहे. ११ जानेवारीपासून दररोज रात्री ८ वाजता हा शो प्रेक्षकांच्या भेटीला येणार आहे. नेहमीप्रमाणे यंदाही सर्वाधिक चर्चा रंगली आहे ती स्पर्धकांच्या नावांवर. सोशल मीडियावर विविध अंदाज, चर्चा आणि तर्क-वितर्क सुरु असतानाच आता एका प्रसिद्ध मराठी अभिनेत्याचं नाव जोरात चर्चेत आलं आहे. ‘चला हवा येऊ द्या’ (Chala Hava Yeu Dya)फेम अभिनेता सागर कारंडे (Sagar Karande) बिग बॉस मराठीच्या घरात प्रवेश करू शकतो, अशी चर्चा सध्या रंगू लागली आहे.(Bigg Boss Marathi 6)
या चर्चेला उधाण आलं आहे ते सागर कारंडेच्या एका सोशल मीडिया पोस्टमुळे. नुकतीच त्याने शेअर केलेली पोस्ट “गंमत झाली आता… जंमत होणार… लवकरच तुमच्या भेटीला 2026”. सध्या चर्चेचा विषय ठरली आहे. या पोस्टमध्ये त्याने थेट बिग बॉसचा उल्लेख केलेला नसला, तरी चाहत्यांकडून विविध अर्थ काढले जात आहेत. त्यामुळे तो खरंच बिग बॉस मराठीच्या सहाव्या पर्वात सहभागी होणार का, याबाबत उत्सुकता वाढली आहे. सागर कारंडेने या चर्चांवर अद्याप कोणतीही अधिकृत प्रतिक्रिया दिलेली नाही.
मात्र, शो सुरू होण्यासाठी आता काहीच दिवस उरले असल्याने लवकरच स्पर्धकांची यादी स्पष्ट होण्याची शक्यता आहे.‘चला हवा येऊ द्या’ या लोकप्रिय विनोदी कार्यक्रमातून सागर कारंडेने स्वतःची वेगळी ओळख निर्माण केली. त्याने साकारलेली स्त्री व्यक्तिरेखा तसेच पोस्टमनची भूमिका प्रेक्षकांच्या विशेष पसंतीस उतरली होती. त्याच्या अभिनयातील सहजता आणि विनोदाची अचूक टाइमिंग यामुळे तो घराघरात पोहोचला. (Bigg Boss Marathi 6)
=================================
=================================
या शोमधून बाहेर पडल्यानंतर सागर फारसा छोट्या पडद्यावर दिसला नाही. सध्या तो ‘हिच तर फॅमिलीची गंमत आहे’या नाटकात व्यस्त आहे. तसेच, ‘चला हवा येऊ द्या’ सोडल्यानंतर पुढे स्त्री भूमिका साकारणार नसल्याचंही त्याने याआधी स्पष्ट केलं होतं. आता तो बिग बॉस मराठीच्या सहाव्या पर्वात सहभागी होणार का, हे पाहणं औत्सुक्याचं ठरणार आहे. प्रेक्षकांना या सगळ्या चर्चांमागचं सत्य लवकरच कळणार आहे.