‘आपल्या डोक्यात हवा गेली म्हणून…’ शरद उपाध्येंनी Nilesh Sable यांना लिहिलेल पत्र चर्चेत… 

‘चला हवा येऊ द्या’ या झी मराठीवरील गाजलेल्या विनोदी कार्यक्रमातून अभिनेता निलेश साबळे एक्झिट घेणार असल्याचं स्पष्ट झालं आहे. अनेक माध्यमांमधून ही माहिती समोर आली असून, त्याच्या जागी प्रसिद्ध टीव्ही अभिनेता अभिजीत खांडकेकर सूत्रसंचालन करणार असल्याचं जवळपास आता निश्चित झालं आहे. निलेशच्या शोमधून बाहेर पडण्याच्या बातमीनंतर सोशल मीडियावर चाहत्यांमधून आणि अनेक प्रसिद्ध व्यक्तींमधून प्रतिक्रियांचा ओघ सुरू झाला आहे. यातच ज्योतिष व राशीचक्र अभ्यासक शरद उपाध्याय यांची प्रतिक्रिया विशेष चर्चेचा विषय ठरली आहे. त्यांनी आपल्या अधिकृत फेसबुक अकाऊंटवर एक दीर्घ पोस्ट लिहून आपला अनुभव शेअर केला आहे. (Sharad Upadhye On Nilesh Sable)

आदरणीय नीलेशजी साबळे,
आपल्याला *हवा येऊ द्या* च्या दुस-या पर्वातून डच्चू देऊन त्या जागी अभिजीत खांडकेकरना आणल्याची बातमी आज पेपरमध्ये वाचली. वाईट वाटले पण आश्चर्य नाही मला तुम्ही एकदा बोलवले होते. त्याप्रमाणे मी ११ वा. पोहोचलो. पण ३ वाजेपर्यंत त्या रुममध्ये कोणीच फिरकले नाही. मला पाणी हवे होते पण एकादोघांना सांगूनही ते आणतो म्हणून गेले ते आलेच नाहीत. मला रुम सोडू नका असे सांगीतले होते. नीलेश तुम्ही इतर कलावंतांच्या रुम मध्ये जाऊन गप्पा मारीत होतात पण माझ्या रुममध्ये डोकावलात ते थेट ४ वा.स्माईलही न देता स्टेजवर गेलात. इतरांचे शूटिंग खूप वेळ केलेत पण मला ६ वा. बोलावून घाईघाईत १५ मिनिटात सारे आटोपले. त्यावेळीही इतर कलावंत मधेमधे बोलत होते. माझा सारा दिवस फुकट गेला. एडिटींग मध्येही माझी उत्तरे गाळलीत. बाहेर आपली भेट झाली तेंव्हा वडीलांच्या नात्याने काही सल्ले दिले. पण कार्यक्रमाचे प्रमुख म्हणून आपल्या डोक्यात हवा गेली होती. दुस-याच्या विषयाबद्दल आदर ठेवायचा असतो पण तुम्ही बेपर्वा होतात. त्याच वेळी मला वाटले की अहंकार अति वाईट. गर्विष्ट माणसाचे अध:पतन होते. एखादी पोस्ट मिळाली की ताठा येतो आणि सर्वनाश होतो. स्टेजवर तुम्ही सा-यांना आपलेसे केले नाही. आपले सादरीकरणही आकर्षक होत नव्हते. या सा-याचा परिणाम म्हणजे तुम्हाला चॅनेलने बाहेर काढले. नीलेशजी स्वभाव मनमिळाऊ असावा , सा-यांना सांभाळून घ्यावे मग सारे एकजुटीने काम करून कार्यक्रमाची चर्चा होईल. अभिजीत खांडकेकर ही धुरा चांगली सांभाळतील. मला त्यांचा सहवास मिळाला आहे. आपण अनुभवी आहात.त्यांना मार्गदर्शन करा. इंडस्ट्रीत आपल्याविषयी असलेले गैरसमज आपल्या चांगल्या कामाने दूर करा.आपल्याला ईश्वराची साथ लाभो ही विनंती. (Sharad Upadhye On Nilesh Sable)

=============================

हे देखील वाचा: निलेश साबळे नाही तर ‘हा’ प्रसिद्ध अभिनेता करणार ‘Chala Hava Yeu Dya 2’ चे सूत्रसंचालन !

=============================

शरद उपाध्ये यांच्या या पोस्टवर अनेक प्रतिक्रिया येऊ लागल्या आहेत. एकाने ‘शरद जी योग्य पद्धतीने कान उपटले. टेलिव्हिजन माध्यमांवर काही लोक स्वतः प्रसिद्धीसाठी येतात. पण काही लोकांमुळे त्या माध्यमाला, त्या कार्यक्रमाला प्रसिद्ध मिळते .’ अशी प्रतिक्रिया दिली आहे तर, एकाने ‘सर खूप छान तुम्ही आम्हाला निलेश साबळे ची ही बाजू दाखवलीत.’ अस म्हणत त्यांच कौतुक केले आहे.