अक्षया हिंदळकर मोठ्या पडद्यावर झळकण्यासाठी सज्ज; P.S.I. Arjun सिनेमात सुपरस्टार अंकुश चौधरीसोबत झळकणार!

PSI Arjun Movie: विविध मालिकांमधून घराघरांत पोहोचलेली गुणी अभिनेत्री अक्षया हिंदळकर (Akshaya Hindalkar) मोठ्या पडद्यावर झळकण्यासाठी सज्ज झाली आहे. ९ मे रोजी प्रदर्शित होणाऱ्या ‘पी.एस.आय. अर्जुन‘ या चित्रपटात ती सुपरस्टार अंकुश चौधरी (Ankush Chaudhari) सोबत स्क्रीन शेअर करणार आहे. 
ॲक्शन आणि सस्पेन्सने भरलेल्या या चित्रपटात अंकुश एका डॅशिंग पोलीस अधिकाऱ्याची भूमिका साकारत असून अक्षया यात कोणत्या भूमिकेत दिसणार, हे सध्या तरी गुलदस्त्यात आहे. असे असले तरी अक्षयाच्या चाहत्यांना ती एका वेगळ्या रूपात पाहायला मिळणार, हे नक्की ! (Actress Akshaya Hindalkar)

आपल्या या भूमिकेबद्दल अभिनेत्री अक्षया हिंदळकर म्हणते, ‘’पहिल्याच चित्रपटात अशा दिग्गजांसोबत काम करायला मिळणे, ही माझ्यासाठी खूप मोठी संधी आहे. आजवर कधीही न साकारलेली भूमिका मी या चित्रपटात साकारणार आहे. चित्रपटाचे स्क्रिप्ट ऐकून मी या चित्रपटाला त्वरित होणार दिला. यात इतके मातब्बर कलाकार असल्याने सुरुवातीला थोडे दडपण होते. परंतु  हे सगळे सहकलाकारला इतके कम्फर्टटेबल करतात, की आपले काम आपसूकच चांगले होते. या सगळ्यांकडून  शिकण्यासारखे खूप आहे. या सगळ्यासोबत काम करण्याचा अनुभव कमाल होता. आता चित्रपटाच्या प्रदर्शनाची तारीख जवळ आली असून मनात संमिश्र भावना आहेत.’’

बऱ्याच दिवसांपासून अंकुश चौधरीच्या वर्दीतील लुकची व डायलॉगची सर्वत्र जोरदार चर्चा होत आहे. महाराष्ट्राचा ‘स्टाईल आयकॉन’ आणि ‘पॉवर परफॉर्मर’ अंकुश चौधरी ‘पी. एस. आय. अर्जुन’मध्ये फुल ॲक्शन रोलमध्ये दिसत आहे. चित्रपटाचे टीझर आणि गाणे आधीच प्रेक्षकांच्या पसंतीस येत असून, प्रेक्षकांच्या मनात या चित्रपटाबद्दल प्रचंड उत्सुकता निर्माण झाली आहे. ही उत्सुकता अधिक वाढवण्यासाठी आता या चित्रपटाचा जबरदस्त ट्रेलर प्रेक्षकांच्या भेटीला आला आहे. नुकताच ‘पी.एस. आय. अर्जुन’ चा भव्य ट्रेलर लाँच सोहळा अतिशय अनोख्या पद्धतीने पार पडला. यावेळी नवापूर पोलीस स्टेशनचे रिक्रिएशन करून जेलमध्ये हा सोहळा संपन्न झाला. 

================================

हे देखील वाचा: Ambat Shoukin Poster: मनोरंजनाचा डोस घेऊन येत आहे ‘आंबट शौकीन’; सिनेमाच भन्नाट पोस्टर प्रदर्शित

=================================

व्हिस्ट्रोमॅक्स सिनेमा, ड्रिमविव्हर एंटरटेनमेंट निर्मित  ‘पी.एस.आय.अर्जुन’चे भूषण पटेल दिग्दर्शक आहेत तर विक्रम शंकर आणि ध्रुव दास निर्माते आहेत. येत्या ९ मे रोजी ‘पी. एस. आय. अर्जुन’ प्रेक्षकांच्या भेटीला येणार आहे.