देसी गर्ल ऑस्करच्या स्पर्धेत….
बॉलिवूडची प्रसिद्ध अभिनेत्री आणि आता मिसेस निक जोनास म्हणून ओळखली जाणारी प्रियंका चोप्रा जोनास आता ऑस्करच्या स्पर्धेत आहे. लवकरच नेटफ्लिक्सवर प्रदर्शित होणा-या द व्हाईट टायगर या चित्रपटातील भूमिकेसाठी प्रियंकाचे नाव ऑस्करच्या स्पर्धेत आले आहे. सर्वोत्कृष्ठ सहाय्यक अभिनेत्री या विभागासाठी प्रियंका चोप्राचे नाव सर्वाधिक पसंतीमध्ये असल्याची माहिती, ऑस्कर पुरस्काराची माहिती देणा-या एका वेबसाईटमध्ये देण्यात आली आहे.
राजकुमार राव सोबत प्रियंकाचा द व्हाईट टायगर हा चित्रपट डिसेंबर महिन्यात काही मोजक्या सिनेमागृहात प्रदर्शित होणार आहे. तर 22 जानेवरी 2021 रोजी द व्हाईट टायगर नेटफ्लिक्सवर प्रदर्शित होणार आहे. मात्र प्रदर्शनापूर्वीच यात प्रियंकाने केलेल्या अभिनयाचे कौतुक होत आहे. नीक जोनास बरोबर लग्न झाल्यावर प्रियंका मोजक्या हिंदी चित्रपटात दिसली आहे. द स्काई इज पिंक या चित्रपटानंतर तिचा द व्हाईट टायगर हा चित्रपट येत आहे. अरविंद अडीगा यांच्या द व्हाईट टायगर या कादंबरीवर आधीरीत हा चित्रपट आहे. या कादंबरीला बुकर पुरस्कारही मिळाला आहे. रामीन बहरानी दिग्दर्शीत या चित्रपटाचे निर्माते मुकूल देवरा आहेत. तर राजकुमार राव प्रियंकाचा सहकलाकर आहे. एका एनआरआय जोडप्याची भूमिका, त्यांना भारतात आलेला अनुभव यावर द व्हाईट टायगरची कथा आधारीत आहे. प्रियंकानं या चित्रपटाचा टिझर आपल्या सोशल अकाऊंटवर शेअर केल्यावर त्यावर लाईकचा पाऊस पडला. प्रियंकाच्या भूमिकेची झलक यात पहायला मिळाली.
ऑस्करसाठी प्रियंकाला मेरील स्ट्रीप (‘द प्रोम’ साठी), हान येन-री (‘मिनारी’ साठी), क्रिस्टिन स्कॉट थॉमस (‘रेबेका’ साठी) आणि ऑलिव्हिया कोलमन (‘द फादर’ साठी) यांच्याबरोबर स्पर्धा करावी लागणार आहे.
हे हि वाचा : गेल्या वर्षी हुकलेलं यश यावर्षी दिल्ली क्राईमनं खेचून आणलं.
प्रियंका सध्या हॉलिवूडमध्येही आपला जम बसवत आहे. प्रियंकाचा वुई कॅन बी हिरोज नावाचा चित्रपट लवकरच प्रदर्शित होत आहे. या चित्रपटाचा टीझर प्रियंकानं तिच्या सोशल अकाऊंटवर शेअर केला. 2021 च्या सुरुवातीला येणा-या या चित्रपटाची बच्चे कंपनीमध्येही उत्सुकता आहे. वुई कॅन बी हिरोज चा टीझर प्रदर्शित करतांना प्रियंकाने या चित्रपटाचे दिग्दर्शक रॉबर्ट रॉड्रीगेज यांची स्तुती केली आहे. शिवाय सुपर कीड्स सोबत शुटींग करतांना मजा आल्याचेही सांगितले आहे. याशिवाय प्रियंका मैट्रिक्स 4 आणि टेक्स्ट फॉर यू या तिच्या आगामी हॉलिवूडपटांसाठीही काम करत आहे.
एकूण आगामी वर्ष प्रियंकासाठी खास ठरणार आहे. बॉलिवूड सोबत हॉलिवूडमध्येही प्रियंकाच्या अभिनयावर ऑस्करमुळे सोनेरी शिक्का लागेल.
