Phullwanti Trailer: दमदार कथा,उत्कृष्ट निर्मितीमूल्य आणि नृत्य- संगीताचा नेत्रसुखद अविष्कार…
मोलमजुरी करीत विनोद ‘सूर्या’सारखा तळपला
शूटिंगला थोडा वेळ होता. विनोद (Vinod Surya) कॉलची वाट पाहात एका खुर्चीवर बसला होता. भारतीय क्रिकेट संघाचा माजी कर्णधार महेंद्रसिंह धोनी याच्याबरोबर तो या जाहिरातीत काम करणार होता. बराच वेळ निघून गेला. तेवढ्यात गलका झाला, ‘धोनी सर आ गये.’ आपला कलावंत सहकारी कोण आहे, हे धोनीनं आधी जाणून घेतलं. तो विनोदकडे आला. त्याच्यासमोर शेकहॅण्डसाठी हात समोर करत म्हणाला, ‘हाय, मैं महेंद्रसिंह धोनी.’ एवढा मोठा स्टार खेळाडू स्वत:हून आपल्याजवळ येऊन हस्तांदोलन करतोय, स्वत:चा परिचयही देतोय, ही बाब विनोदसाठी सुखावणारी होती. आपणही ‘स्पेशल’ आहोत, ही जाणीव तेव्हा त्याला झाली.
काही चेहरे सतत झळकत असतात. ते आपल्या परिचयाचे होतात. विनोद सूर्या हा गुणी कलावंतही त्यातीलच एक. रणबीर कपूरसोबतची ‘बिंगो टेढे मेढे’, महेंद्रसिंह धोनीसोबतची ‘खाताबुक’ यासह ८२ जाहिराती, ‘ड्रीमगर्ल’, ‘झोंबिवली’, ‘मोतीचूर चकनाचूर’सारखे सुमारे बारा हिंदी-मराठी चित्रपट, अनेक वेबसीरिज यांमधून त्यानं आपल्यातील कलेची चुणूक दाखविली आहे. कधीकाळी मोलमजुरी करणारा, सुरक्षारक्षक म्हणून काम करणारा विनोद आज मनोरंजन क्षेत्रात ‘सूर्या’सारखा तळपत आहे.
विनोद सूर्यवंशी असं त्याचं खरं नाव. त्याचं कुटुंब मूळचं कर्नाटकातलं. घरची परिस्थिती अतिशय हलाखीची. मोलमजुरीसाठी त्याचे आई-वडील १९८०च्या दशकात मुंबईला आले, अंधेरीला राहू लागले. विनोदचा जन्म १ नोव्हेंबर १९८७ रोजी झाला. त्यावेळी वडील लक्ष्मण सूर्यवंशी आणि आई कलावती हे दोघेही रोजंदारीवर काम करत होते. रेती, सिमेंट वाहून नेण्याचे कामही त्यांनी केले.
मिळकत तुटपुंजी होती. अशा परिस्थितीतही त्यांनी विनोदला मराठी शाळेत टाकलं. जाणत्या वयापासून विनोदही छोटी-मोठी कामं करून कुटुंबाला हातभार लावू लागला. त्यामुळे दहावीनंतर शिक्षण थांबलं. एका ठिकाणी त्याला सुरक्षारक्षकाची नोकरी मिळाली. त्याची ती नाइट शिफ्ट होती. तोवर अभिनयक्षेत्राचा साधा गंधही त्याला नव्हता. या क्षेत्रात आपण येऊ, याची पुसटशी कल्पनाही नव्हती. मात्र, नशिबाच्या मनात वेगळंच काही दडलं होतं.
एकदा मित्र पिंटू याचा त्याला फोन आला. मड आयलंडला एक शूटिंग सुरू होतं. तिथं ज्युनिअर आर्टिस्ट्सची गरज होती. त्यासाठी दिवसभराचे पाचशे रुपये मिळतील, असंही पिंटूनं सांगितलं. विनोदची नाइट शिफ्ट असल्यानं दिवसभराचं ते काम शक्य होतं. म्हणून तो शूटिंगस्थळी गेला. तिथं हे क्षेत्र त्याला भावलं. आता याच क्षेत्रात यायचं, असं त्यानं ठरवलं. (Success story of Vinod Surya)
विनोदने काही वर्षं ज्युनिअर आर्टिस्ट म्हणून काम केलं. नंतर वाटलं, “आता खूप झालं ज्युनिअर आर्टिस्टचं काम.” नंतर ऑडिशन देणं सुरू झालं. घरी तशी कल्पना दिली. आधीच हातावर पोट भरणं सुरू होतं. त्यात हे मनोरंजन क्षेत्र बेभरवशाचं. त्यातही ‘तुला ना रंगरूप ना अनुभव’, असंही घरच्यांचं मत पडलं. मात्र, विनोद ठाम होता. इतर कामं करत तो निर्माते-दिग्दर्शकांचे उंबरठे झिजवू लागला, ऑडिशन देऊ लागला. अनेक ठिकाणी निराशा पदरी पडत होती. मात्र, त्यानं जिद्द सोडली नाही.
यादरम्यान वडिलांचं निधन झालं. संपूर्ण कुटुंबाची जबाबदारी येऊन पडली. अनेक अडचणी उभ्या ठाकल्या. हे कमी होतं की काय, आईला कर्करोगाचं निदान झालं. तरी तो डगमगला नाही. त्याला जाहिरातींमधून कामं मिळू लागली.
सर्वप्रथम २०१६ मध्ये ‘वन टच’च्या जाहिरातीत सुप्रसिद्ध अभिनेता बोमन इराणीसोबत अभिनय करण्याची संधी मिळाली. मग कामं वाढत गेली. ऑडिशन देणं सुरूच होतं. मोठ्या मेहनतीनंतर सिनेमा क्षेत्राची दारं खुली झाली. अनुष्का शर्माच्या ‘परी’ या चित्रपटातून त्यानं मोठ्या पडद्यावर एंट्री केली. जॉन अब्राहमचा ‘सत्यमेव जयते’, ‘झोंबिवली’, ‘ड्रीमगर्ल’, ‘मोतीचूर चकनाचूर’, ‘बोनस’ हे चित्रपट, ‘शोले गर्ल’, ‘कार्टेल’, ‘जमतारा’, ‘मर्डर इन ॲगोंडा’, ‘इनव्हिजिएबल वूमन’, ‘ये काली काली आँखे’, या वेबसीरिज, ‘लक्ष्य’, ‘असावा सुंदर स्वप्नांचा बंगला’ या मालिका असा त्याचा प्रवास आहे. (Success story of Vinod Surya)
‘मुंबईकर’कडून मोठ्या आशा
सुप्रसिद्ध दाक्षिणात्य दिग्दर्शक संतोष सिवन दिग्दर्शित ‘मुंबईकर’ या आगामी चित्रपटात विनोदची महत्त्वाची भूमिका आहे. सुपरस्टार विजय सेथुपती यात नायक आहे. विजय एवढा मोठा स्टार असूनही खूप जमिनीवर आहे, त्याच्याकडून बरंच काही शिकता आलं, असं विनोद सांगतो. या चित्रपटासाठी कास्टिंग डायरेक्टर पराग मेहता यांनी विनोदची निवड केली.
दिग्दर्शक संतोष सिवन यांच्यासोबतच्या पहिल्या भेटीचा खुमासदार किस्सा सांगितला. संतोष यांनी भेटायला बोलवलं. त्यांना हिंदी बोलता येत नाही. विनोदसमोर ते कित्येक वेळ इंग्रजीतून बोलत होते. त्यातलं विनोदला फारसं काही कळत नव्हतं. तो फक्त हो-नाही असा मानेनंच प्रतिसाद देत होता. मीटिंगनंतर तो बाहेर आला अन् बुचकळ्यात पडला. पराग मेहता यांनी त्याच्या चेहऱ्यावरची अस्वस्थता ओळखली अन् ‘काय झालं’, असं विचारलं. विनोदनं सांगितलं, “संतोष सर काय म्हणाले ते काही कळलं नाही. काय करावं नेमकं?’ पराग फक्त हसले. म्हणाले, “चिंता मत कर. वहाँ पर हिंदी में समझाने वाले भी होंगे.” तेव्हा कुठं विनोदच्या जिवात जीव आला. (Success story of Vinod Surya)
ऑडिशनमधूनच शिकलो…
सुरक्षारक्षकाचं काम करेपर्यंत विनोदला या क्षेत्राचं काहीही ज्ञान नव्हतं. ज्युनिअर आर्टिस्ट म्हणून काम करताना या क्षेत्रानं खुणावलं होतं. अभिनयक्षेत्रात यायचं तर अनेकजण बालपणापासून तयारी करतात. घरी तसं वातावरण असावं लागतं, प्रशिक्षण वगैरे लागतं. मग ही कला कशी साध्य केली, असं विचारल्यावर विनोद म्हणाला, “ऑडिशन हीसुद्धा शिकण्याचीच एक पद्धत असते. इतरांचं काम पाहूनही आपण शिकत जातो. डायलॉग डीलिव्हरी कशी असावी, प्रसंगानुरूप आपण कसं रिॲक्ट व्हायचं, या बाबी तिथंच आत्मसात केल्या. कुठल्याही क्षेत्रात जायचं तर त्याचं ज्ञान आवश्यक असतं.”
विनोदनं जाहिराती, मालिका, चित्रपट, वेबसीरिज अशा सर्व माध्यमांतून कामं केली आहेत. या नव्या माध्यमांचा मोठ्या पडद्याला धोका आहे का, असं विचारलं असता तो सांगतो, “प्रत्येक माध्यमाची ताकद अन् गुणवत्ता वेगळी आहे. मात्र, सध्या स्टार नाही, तर कंटेंटवर कुठलीही कलाकृती चालते. चित्रपटांमध्ये चांगला कंटेंट आला, वेगवेगळे प्रयोग झाले तरच चित्रपटगृहांत प्रेक्षक येतील.”
हिंदी आणि मराठीमध्ये काय फरक वाटतो’, या प्रश्नावर तो उत्तरतो, “हिंदीत ट्रीटमेंट चांगली असते. व्हॅनिटी व्हॅनसारख्या सुविधा असतात. अर्थात, यासाठी त्यांचं बजेट चांगलं असतं.” (Success story of Vinod Surya)
=============
हे ही वाचा: मालगुडी डेज: मालिकेची आठवण म्हणून चक्क रेल्वे स्टेशन बदललं म्युझिअममध्ये!
हे आहेत भारतामधील विवादित टॉप १० चित्रपट ज्यांच्यावर सेन्सॉरने बंदी घातली…
==============
विनोदला पत्नी कल्पना यांची चांगली साथ आहे. या दोघांच्या संसारवेलीवर गायत्री अन् नील ही फुलं आहेत. त्याची प्रत्येक भूमिका मोहित करणारी असते. “कोणत्याही क्षेत्रात काम करताना अनेक संकटं येतात. अनेक अडचणींना सामोरं जावं लागतं. मात्र न डगमगता ध्येय गाठण्यासाठी स्वतःला झोकून देण्याची तयारी ठेवावी”, असं त्याचं मत आहे. सदैव जमिनीवर असलेला विनोद कमालीचा नम्र आणि दिलदार आहे. रसिकांच्या चेहऱ्यावर हसू फुलवण्याचं वरदान त्याला लाभलेलं आहे. आपल्यातील कलागुणांच्या भरवशावर तो हे क्षेत्र काबीज करीत आहे.