अभिनेत्री तेजश्री प्रधानचं छोट्या पडद्यावर दमदार कमबॅक;’या’ मालिकेत साकारणार मुख्य भूमिका !
काही अभिनेत्री त्यांच्या अभिनयाने प्रेक्षकांच्या मनात विशेष स्थान निर्माण करतात. तशीच एक अभिनेत्री म्हणजे तेजश्री प्रधान. तेजश्री गेल्या काही काळापासून टेलिव्हिजन पासून दूर जरी असली तरी प्रेक्षक तिला विसरलेले नाहीत. आता तेजश्रीच्या चाहत्यांसाठी आनंदाची बातमी समोर आली आहे. महाराष्ट्राच्या घराघरात आणि मनामनात पोहोचलेली सुप्रसिद्ध अभिनेत्री तेजश्री प्रधान टेलिव्हिजनवर दमदार कमबॅक करण्यासाठी सज्ज झाली आहे. स्टार प्रवाहच्या एका नव्या मालिकेतून एका नव्या अंदाजात तेजश्री प्रेक्षकांच्या भेटीला येणार आहे. या मालिकेत तिची नेमकी कोणती भूमिका असणार हे अद्याप गुलदस्त्यात आहे. मात्र हे नवं पात्र साकारण्यासाठी तेजश्री प्रचंड उत्सुक आहे.(Actress Tejashri Pradhan)
या नव्या पात्राविषयी सांगताना तेजश्री म्हणाली, ‘मी ठरवून एक प्रोजेक्ट संपल्यानंतर काही काळ दिसणं टाळते. देवकृपेने प्रेक्षक माझ्या नव्या प्रोजेक्टची आतुरतेने वाट पहात असतात. जसं घरातली एखादी व्यक्ती कामानिमित्ताने बाहेर गेली की घरातले तिच्या वाटेकडे डोळे लावून बसेलेले असतात. अगदी तसाच अनुभव एक कलाकार म्हणून मीही घेतलाय. गेले कित्येक दिवस पुन्हा कधी भेटीला येणार याविषयी विचारणा होत होती. स्टार प्रवाहवर लवकरच एका नव्या मालिकेतून मी भेटीला येणार आहे हे सांगताना अतिशय आनंद होतोय. मला सकारात्मक भूमिका साकारायला आवडतं. माझी नवी भूमिका देखिल सकारात्मकच असेल. टेलिव्हिजन हे माझं आवडतं माध्यम आहे. खरतर कोरोना नंतर बऱ्याच गोष्टी बदलल्या आहेत. सोशल मीडियाचं महत्त्वही दिवसेंदिवस वाढत आहे. मी या सर्वच गोष्टी पुन्हा एकदा नव्याने अनुभवतेय. प्रामाणिकपणे काम करण्याचा नेहमीच प्रयत्न करत आले आहे आणि यापुढे देखिल करत राहिन. प्रेक्षकांचं प्रेम असंच मिळत राहो हीच अपेक्षा. जवळपास १२ वर्षांपूर्वी मी स्टार प्रवाहची ‘तुझं नि माझं घर श्रीमंताचं’ ही मालिका केली होती. काही दिवसांपूर्वी ‘फुलाला सुगंध मातीचा‘ मालिकेतही पाहुण्या कलाकाराची भूमिका साकारली होती. नव्या मालिकेच्या निमित्ताने महाराष्ट्राच्या नंबर वन वाहिनीसोबत पुन्हा एकदा जोडली जातेय याचा आनंद आहे.”
नुकताच तेजश्रीने या संबंधित व्हिडीओ सोशल मीडियावर शेअर केला आहे.“आपली मराठी परंपरा मराठी प्रवाह… येस, बरोबर ओळखलंत. मी येतेय आपल्या स्टार प्रवाहच्या नव्याकोऱ्या मालिकेतून खास तुमच्या भेटीसाठी…आता मालिकेचं नाव, तारीख, वेळ ही सगळी उत्सुकता पूर्ण होणार आहे, आमच्या नव्याकोऱ्या प्रोमोमधून. पण त्यासाठी तुम्ही बघत राहा, आपलं स्टार प्रवाह.”अस तेजश्री या व्हिडीओमध्ये बोलताना दिसत आहे.(Actress Tejashri Pradhan)
==========================
हे देखील वाचा: प्रिया-उमेश दशकानंतर घेऊन येत आहेत ‘जर तर ची गोष्ट’…
==========================
झी मराठी वाहिनीवरील ‘होणार सून मी ह्या घरची’ या लोकप्रिय मालिकेतून अभिनेत्री तेजश्री प्रधान घराघरात पोहोचली. या मालिकेमुळे खरी ओळख मिळाली अस म्हणन वावग ठरणार नाही. त्यानंतर बराच काळ ती अभिनय क्षेत्रापासून दूर होती. त्यानंतर ‘अग्गंबाई सासूबाई’ या मालिकेनंतर ती कुठल्याही मालिकेत झळकली नाही. त्यादरम्यान ती सोशल मीडियावरील मात्र एक्टिव्ह असायची आणि तिच्या पोस्टमुळे ती नेहमीच चर्चेत ही असायची. आता पुन्हा एकदा ती मालिकेतुन प्रेक्षकांना भेटायला येतेय या बातमीमुळे चाहत्यांना आनंद झाला आहे आणि तिने पोस्ट केलेल्या वव्हिडिओच्या खाली तिचे चाहते कमेंट करत त्यांचा आनंद ही व्यक्त करताना पहायला मिळत आहेत.
