माझा सुरजलाच पाठिंबा – वैभव चव्हाण

सध्या सर्वत्र फक्त बिग बॉसचीच हवा आहे. बिग बॉसमध्ये सतत होणाऱ्या विविध घटनांमुळे हा शो प्रकाशझोतात राहतो. बिग बॉसचा हा पाचवा सिझन सुरु आहे. मात्र या सिझनने मागील चारही सीझनपेक्षा जास्त लोकप्रियता मिळवली आहे. टीआरपीच्या अनेक रेकॉर्ड मोडत या पर्वाने नवीन रेकॉर्ड सेट केले केले आहे. बिग बॉसचा हा सिझन हिट होण्याची अनेक कारणं आहेत.

मागील आठवड्यात तर बिग बॉसच्या घरात अनेक अनपेक्षित आणि आश्चर्यचकित गोष्टी घडलेल्या पाहायला मिळाल्या. आर्याने भांडणात निक्कीच्या गालात चापट लावली आणि तिला शिक्षा म्हणून घरातून निष्कासित करण्यात आले. आर्या घराबाहेर पडल्याने या आठवड्यात कोणी नॉमिनेट होणार नाही असे वाटत असतानाच वैभव चव्हाण हा घराबाहेर पडला. त्याला मिळालेल्या कमी मतांमुळे या घराचा निरोप घ्यावा लागला.

घरातून बाहेर आल्यानंतर वैभवने सुरज चव्हाणबद्दल एका मुलाखतीमध्ये त्याचे मत व्यक्त केले आहे. वैभव चव्हाणने ‘राजश्री मराठी’ला दिलेल्या मुलाखतीत सुरजबद्दल वक्तव्य केले आहे. वैभवला मुलाखतीमध्ये विचारले गेले की, तो बिग बॉसच्या घरात असलेल्या कोणत्या एका व्यक्तीला पाठिंबा देणार? यावर त्याने सांगितले, “खरं सांगू का तर त्या व्यक्तीचा आणि माझा बॉण्ड लोकांना माहीतच नाहीये. सुरज ही या घरातील अशी व्यक्ती आहे की, ज्याला मी आधीपासूनच ओळखतो. त्याचे गाव माझ्या गावाशेजारीच आहे. त्याच्या चित्रपटांच्या प्रमोशनला मी पाहुणा म्हणून देखील गेलो आहे, त्याला भेटलेलो आहे. आमचे एक चव्हाण-चव्हाण हा जो बॉण्ड आहे, ते आधीपासूनच आहे.”

मुलाखतीमध्ये पुढे वैभव म्हणाला, “घरात आमच्यात जी भांडणं झाली, ती तेवढ्यापुरती होती. त्याला राग आला आणि मलाही राग आला. मात्र ते त्या वेळेपुरतेच होते. आम्ही जिम एकत्र करायचो. कपडे शेअर करायचो. माझ्या हुडीज वगैरे मी त्याला दिल्या आहेत. मी त्याची दोन वेळा दाढीपण करून दिली आहे. बाहेरही त्याचे आणि माझं नातं चांगलं होतं.”

सुरजच्या स्वभावाबद्दल वैभवने सांगितले की, “मला मनापासून वाटते की, सुरज खूपच साधा, सरळ माणूस आहे. त्याला जे योग्य वाटते तेच तो करतो. कोणाचेही ऐकून तो अजिबात वागत नाही. बी ग्रुपमध्ये ज्यावेळी माझ्याबद्दल काही गोष्टी बोलल्या जात होत्या, त्यावेळी तो ऐकतो कोण चांगलं आहे, कोण वाईट आहे. कितीही नाही म्हटले तरी ते मनात राहते आणि मला माहीत नाही की, माझ्याबद्दल त्या ग्रुपमध्ये काय बोललं गेलंय. त्याचा थोडाफार प्रभाव असू शकतो.”

==============================

हे देखील वाचा: बाप्पाचा आशीर्वाद घेत ‘पाणी’सिनेमाचा टिझर लाँच; आदिनाथ कोठारेचा लूक ही आला समोर…

==============================

सुरजला पाठिंबा देण्याबद्दल वैभव म्हणाला, “मी सुरजला पाठिंबा देईन. कारण तो माझ्या गावचा आहे. मला माहितेय तो पहिल्यापासून कसा आहे. तो कोणत्याच खोट्या गोष्टी करत नाही. तो पहिल्यांदाच या शोमध्ये आला आहे आणि मी पण पहिल्यांदाच या अशा शोमध्ये आलो होतो. मला ज्या गोष्टी कळल्या नाहीत, त्या त्याला कळल्या तो खूप स्मार्ट आहे. त्याच्याबरोबर जी भांडणं झाली, ती वैयक्तिक नव्हती. येताना मी त्याला मिठी मारली आणि सांगितलं की, ट्रॉफी बारामतीत पाहिजे.”