सलमान खानच्या ”सिकंदर”मध्ये ‘कटाप्पा’ची एन्ट्री

बॉलिवूडचा दबंग खान सलमान खान नेहमीच विविध गोष्टींमुळे चर्चेत असतो. बॉलिवूडमध्ये सर्वात जास्त फॅन्स असणारा अभिनेता म्हणून त्याची ओळख आहे. सलमान खानने नेहमीच त्याच्या चित्रपटांच्या माध्यमातून प्रेक्षकांचे अमाप मनोरंजन केले. एका वर्षात सलमानचा एकतरी सिनेमा येतच असतो. २०२३ मध्ये त्याचा बहुप्रतीक्षित असा ‘टायगर ३’ सिनेमा आला होता. सिनेमाला चांगला प्रतिसाद मिळाला.

‘टायगर 3’ नंतर त्याच्या फॅन्सचे लक्ष लागले होते की, आता सलमान खान कोणत्या नवीन सिनेमात दिसणार. काही महिन्यांपूर्वीच सलमानने त्याच्या ‘सिकंदर’ या सिनेमाची घोषणा केली. सिनेमाचे पोस्टर आणि रिलीज डेटसह ही घोषणा करण्यात आली होती. सलमानच्या या सिनेमात कोण कोण असणार आणि कोणती भूमिका साकारणार याबद्दल आता हळूहळू माहिती समोर येत आहे.

‘सिकंदर’मध्ये सलमान खान पहिल्यांदाच रश्मिका मंदानासोबत दिसणार आहे. या सिनेमात मुख्य खलनायक म्हणून अभिनेते सत्यराज अर्थात बाहुबली सिनेमातील कटप्पा दिसणार आहे. सत्यराजने या चित्रपटाच्या शूटिंगला सुरुवात केली आहे. नुकतीच चित्रपटाच्या टीमकडून याबद्दल सोशल मीडियाच्या माध्यमातून माहिती देण्यात आली आहे.

‘सिकंदर’ सिनेमाच्या निर्मात्यांनी सोशल मीडियावर सत्यराज आणि प्रतीक बब्बर यांचा एक फोटो शेअर करत लिहिले, “सत्यराज सर तुमचे स्वागत. आज तुमचे स्वागत करताना आम्हाला खूप आनंद होत आहे! ‘सिकंदर’ सिनेमाच्या टीममध्ये तुमचा प्रवेश झाल्याने आम्हाला तो एक आमचा सन्मान वाटत आहे. प्रतिक बब्बरसोबत पुन्हा एकदा काम करताना आनंद होत आहे. या चित्रपटाची जादू मोठ्या पडद्यावर पाहण्यासाठी आम्ही सर्व प्रेक्षक सिनेमाची आतुरतेने वाट पाहत आहोत.”

======

हे देखील वाचा : ‘कल्की’ चित्रपटाच्या हिंदी व्हर्जनची पहिल्याच आठवड्यात १५३ कोटींची कमाई

======

दरम्यान ‘सिकंदर’ सिनेमाचे दिग्दर्शन दाक्षिणात्य दिग्दर्शक एआर मुरुगडस करत असून, सिनेमाची निर्मिती नाडियाडवाला ग्रँडसन करत आहे. नाडियाडवाला ग्रँडसनकडून सोशल मीडियावर तीन फोटो पोस्ट करण्यात आले आहे. यातल्या एका फोटोमध्ये ‘सिकंदर’ सिनेमाचे पोस्टर असून, दुसऱ्या फोटोमध्ये अभिनेते सत्यराज आणि तिसऱ्या फोटोमध्ये सत्यराज, प्रतीक बब्बर दिसत आहे. २०२५ साली ईदच्या दिवशी हा सिनेमा प्रदर्शित होणार आहे.