कार्तिक-कियाराच्या नव्या सिनेमाचा ट्रेलर प्रदर्शित
कार्तिक आर्यन आणि कियारा अडवानी यांची मुख्य भूमिका असलेला ‘सत्यप्रेम की कथा’ हा चित्रपट २९ जून रोजी प्रेक्षकांच्या भेटीला येतोय. नुकताच या चित्रपटाचा ट्रेलर प्रेक्षकांच्या भेटीला आला. म्युझिकल लवस्टोरी असणाऱ्या या चित्रपटाचे दिग्दर्शन समीर विद्वांस यांनी केले आहे. समीर विद्वांस यांचा हा पहिला हिंदी चित्रपट असेल.(Kiara-Kartik)
दोन मिनिटे छत्तीस सेकंदाच्या या ट्रेलरमध्ये लग्नानंतरचे प्रेम दाखवण्यात आलेले आहे. कार्तिक आर्यन ज्या रोल्ससाठी प्रसिद्ध आहे, तोच ‘चॉकलेट लवर बॉयचा’ रोल साकारताना तो दिसतोय. कार्तिक आर्यन आपल्या पात्राशी पूर्णपणे एकरूप झालेला ट्रेलरमध्ये बघायला मिळतो. कियारा अडवाणी देखील आपल्या अभिनयाने व सौंदर्याने ट्रेलरला अजून आकर्षक करताना दिसून येते.(Kiara-Kartik)
प्रेम, लग्न व त्यानंतर सुखाचा संसार या पारंपारिक प्रेमकथेला तडा देणारी ही गोष्ट असेल असे ट्रेलरवरून प्रकर्षाने जाणवते. कियाराच्या पात्राला म्हणजेच ‘कथा’ला आपल्या प्रेमात पाडण्यासाठी कार्तिक आर्यनचे पात्र ‘सत्यप्रेम’ उत्सुक असल्याचे दिसून येते. प्रेम, लग्नानंतर मात्र यांच्या आयुष्यात हॅप्पिली एव्हर आफ्टर वाला काळ काही येत नसल्याचे दिसून येते.(Kiara-Kartik)
चित्रपटातील गाणी ऐकायला मधुर वाटतात तर चित्रपटातील दृश्यही सुंदर आणि भव्य असल्याचे बघायला मिळते. त्याचबरोबर चित्रपटात मसाला रोमॅंटिक डायलॉग्सचा भरपूर भरणा असल्याचे ट्रेलरवरून दिसून येते. मोहक दृश्य, कार्तिक-कियाराची अफलातून केमिस्ट्री व सोबतीला मनोरंजक प्रेमकथेची जोड यामुळे चित्रपटाच्या रिलीजबाबत उत्सुकता वाढली आहे. जूनमधील पावसाळी वातावरणात प्रेमाचे तरंग उठवत हा चित्रपट येत्या २९ जून रोजी प्रेक्षकांच्या भेटीला येणार आहे. कियारा आणि कार्तिकचा ‘भूल भुलैय्या’ नंतरचा हा सोबत दुसरा चित्रपट असेल.(Kiara-Kartik)
अनेक हिट मराठी चित्रपटांचे दिग्दर्शन करणारे समीर विद्वांस या चित्रपटाच्या माध्यमातून बॉलीवूडमध्ये पदार्पण करत आहेत. समीर यांना ‘आनंदी गोपाळ’ या चित्रपटासाठी राष्ट्रीय पुरस्काराने सन्मानित करण्यात आले आहे. ‘डबल सीट’, ‘वायझेड’, ‘धुरळा’ यांसारख्या जबरदस्त मराठी चित्रपटांचे दिग्दर्शन समीर विद्वांस यांनी यापूर्वी केले आहे. चित्रपटांचा भावनिक गाभा, व्यावसायिक मूल्य जपत चित्रपट बनवण्यासाठी ते ओळखले जातात. त्यांच्याकडून आणखी एका धमाकेदार चित्रपटाची त्यांच्या चाहत्यांना अपेक्षा आहे.(Kiara-Kartik)
======
हे देखील वाचा : जुनियर एनटीआरचा नवीन पोस्टर चाहत्यांच्या भेटीला
======
कार्तिक आर्यन आणि कियारा अडवानी यांच्यासोबतच चित्रपटात अनेक प्रतिभावान मंडळी बघायला मिळणार आहेत. रितू शिवपुरी, मेहरू शेख, सुप्रिया पाठक, गजराज राव, शिखा तलसानिया, अर्नब अकीब, भार्गव पोलारा आदी कलाकार चित्रपटाचा महत्वाचा भाग आहेत. करण श्रीकांत शर्मा लिखित या सिनेमाची निर्मिती साजिद नाडियादवाला, शरीन मंत्री केडिया आणि किशोर अरोरा यांनी केली आहे. ‘नाडियादवाला ग्रँडसन एंटरटेनमेंट’ व ‘नमाह पिक्चर्स’ या बॅनरखाली चित्रपटाची निर्मिती झाली आहे.
