Maharashtrachi Hasyajatra फेम Dattu More ची विनोदापाठोपाठ व्यवसायातही एंट्री; सुरु केलं
Maharashtrachi Hasyajatra फेम Dattu More ची विनोदापाठोपाठ व्यवसायातही एंट्री; सुरु केलं स्वतःच क्लाउड किचन…
गेल्या काही काळात मराठी मनोरंजनसृष्टीत एक वेगळा ट्रेण्ड पाहायला मिळतोय. अभिनयासोबतच अनेक कलाकारांनी स्वतःचा व्यवसाय सुरू करतनव्या क्षेत्रात पदार्पण केल्याच पहायला मिळत आहे . कुणी फॅशन ब्रँड उभारले, तर कुणी हॉटेल आणि फूड इंडस्ट्रीत आपलं नशीब आजमावलं. आता या यादीत ‘महाराष्ट्राची हास्यजत्रा’ ( Maharashtrachi Hasyajatra) फेम विनोदी कलाकार दत्तू मोरे (Dattu More) याचंही नाव सामील झालं आहे. आपल्या हटके विनोदशैलीमुळे मराठी प्रेक्षकांच्या मनात घर करणारा दत्तू मोरे सध्या अभिनयामुळे नाही, तर एका नव्या व्यावसायिक निर्णयामुळे चर्चेत आहे. दत्तूनं नुकताच स्वतःचा छोटेखानी व्यवसाय सुरू केला असून, याबाबतची माहिती त्यानं सोशल मीडियावर शेअर केलेल्या व्हिडिओद्वारे दिली आहे.(Dattu More)
दत्तूने आता व्यवसायविश्वात पाऊल टाकत ठाण्यात ‘Daily Bowl’ नावाचं क्लाउड किचन सुरू केलं आहे. धावपळीच्या जीवनशैलीमुळे जंक आणि तेलकट पदार्थांकडे वाढणारा कल लक्षात घेत, त्यातून एक सकारात्मक पर्याय निर्माण करण्याचा त्याचा प्रयत्न आहे. सर्वसामान्यांना परवडणाऱ्या दरात, घरगुती चवीचे आणि पौष्टिक अन्न उपलब्ध करून देणं, हा या उपक्रमामागचा मुख्य उद्देश असल्याचं दत्तूने स्पष्ट केलं आहे.या नव्या सुरुवातीसाठी दत्तूच्या मित्र-मैत्रिणींनी तसेच चाहत्यांनी त्याच्यावर शुभेच्छांचा वर्षाव केला आहे. खरंतर दत्तूसाठी हे वर्ष वैयक्तिक आणि व्यावसायिक अशा दोन्ही पातळ्यांवर विशेष ठरत आहे. काही महिन्यांपूर्वीच तो वडील झाला असून, आता स्वतःच्या व्यवसायाची सुरुवात झाल्यानं त्याच्या आयुष्यात आनंदाचे नवे पर्व सुरू झालं आहे.
या प्रवासात दत्तूला त्याची पत्नी डॉ. स्वाती घुनागे-मोरे यांचीही भक्कम साथ लाभत आहे. वैद्यकीय क्षेत्रात कार्यरत असलेल्या स्वाती यांनी या उपक्रमासाठी त्याला मोलाचं मार्गदर्शन आणि पाठिंबा दिला आहे.दत्तूच्या कारकिर्दीकडे पाहिलं तर त्याचा प्रवास तितकाच प्रेरणादायी आहे. वागळे इस्टेटमधील रामनगर परिसरातल्या साध्या चाळीत वाढलेला दत्तू सुरुवातीला पडद्यामागे काम करत होता. मेहनत, सातत्य आणि स्वतःवरचा विश्वास यांच्या जोरावर तो कॅमेऱ्यासमोर आला आणि अल्पावधीतच प्रेक्षकांचा लाडका कलाकार बनला. (Dattu More)
===========================
===========================
‘महाराष्ट्राची हास्यजत्रा’ या कार्यक्रमानं अनेक नवोदित कलाकारांना ओळख मिळवून दिली आणि त्या यादीत दत्तू मोरेचं नाव आवर्जून घेतलं जातं. आज अभिनयासोबतच व्यवसायातही पाऊल टाकत दत्तू एक नवा आदर्श निर्माण करत असल्याचं चित्र दिसत आहे.